4 compañíes asturianes pa conocer el panorama del teatru n’asturianu

Asturies tien una montonera compañíes de teatru qu’usen l’asturianu nes sos representaciones. Dende’l teatru amateur al profesional, dende les obres contemporánees al teatru costumista clásicu, presentámoste cuatro compañíes comprometíes col idioma.

COMPAÑÍA ASTURIANA DE COMEDIES

Acabante cumplir cien años sobre los escenarios, la Compañía Asturiana de Comedies ye un referente hestóricu del teatru costumista asturianu. Al entamu del sieglu XX entamó la so actividá con obra de Pachín de Melás y nos años cincuenta vivió la so dómina dorada con actuaciones internacionales en países americanos. Dempués d’un parón qu’entamaría nos años sesenta, torna en 1986, con Arsenio González, Eladio Sánchez, Pili Ibaseta o Josefina García y un gran ésitu que lleva a que dende 1999 cada mes d’agostu tean sobre l’escenariu del Teatru Xovellanos de Xixón trés díes consecutivos y con un ésitu ablucante. Anguaño, les nueves xeneraciones ábrense pasu nel grupu con un nuevu director al frente, Sergio Buelga y actores como Armando Felgueroso, Mar Buelga, Norberto Sánchez o Mario Valdés. 

 

GRUPU DE TEATRU TELÓN DE FONDO

El grupu de teatru Telón de Fondu ñaz en 1973 en Xixón como grupu d’empresa de l’antigua ENSIDESA, siendo na actualidá unu de los grupos más vieyos d’Asturies. A partir de 1985 desvencéyase de la empresa y confórmase como grupu de teatru independiente.  Ensiguida comprométense col usu l’asturianu y tienen montaes obres d’autores internacionales tornaes al asturianu, asina como obres clásiques d’autores asturianos, como L’Ensalmador, d’Antón de Marirreguera, primer autor conocíu en llingua asturiana. El grupu fai los sos montaxes sobre manera n’Asturies, nun deséu de contribuyir dende l’escenariu a la normalización del asturianu y la cultura d’Asturies, lo que nun torgó llevar les sos actuaciones a otros llugares ente los que puede citase: Lisboa, Madrid, Bruxeles, Liexa, etc.

 

PRODUCCIONES NUN TRIS

Fundada como agrupación semiprofesional en 1992, y depués definitivamente profesional nel 1997, Producciones nun tris ye la obra d’Inma Rodríguez y Antón Caamaño, que xunto a más de 150 persones que pasaron pel grupu nestos años, consiguió crear obres de gran valir. Más de cincuenta espectáculos producíos, pa too tipu de públicu y de tolos estilos. Clásicu, teatru y danza contemporáneu, ópera pa neños y neñes, comedia del arte, cai, zarzuela, drama, comedia… D’estos cincuenta, más o menos la metá tienen al asturianu como llingua vehicular, siendo dalgunos billingües, convirtiéndose nel grupu profesional que más aportó al teatru n’asturianu nestes décades últimes, con obres y montaxes como “El caballeru de la murnia figura”, “La Vixigona nun tien remediu”, “Los socedíos de Nelón” o “Lletres d’una castañal”.

HIGIÉNICO PAPEL

Esti grupu de teatru profesional fórmase en 1996 y dende entós lleva producíos más de trenta espectáculos de gran diversidá temática y espresiva, siempres marcaes por un cuñu personal que conxuga toques d’humor, provocación, y poesía. Magar qu’a lo llargo d’estos años la compañía trabayó los más diversos xéneros (infantil, humor, adultos, cai, cabaré, pequeñu formatu, títeres, teatru clásicu, teatru xestual…) destaquen con especial fuercia los sos espectáculos pa públicu infantil y familiar, amás los espectáculos d’humor para mozos y adultos. Otru de los puntos fuertes de l’agrupación ye la creación, dirección y puesta n’escena de toa triba d’intervenciones teatrales a la carta: animaciones, presentaciones, gales, sketches, espectáculos de temátiques específiques pa eventos, etc… Delles de los sos espectáculos pueden atopase n’asturianu, como “Árbol”, “Nunca nun se sabe” o “Una casa”.

Artículos rellacionaos

Domingu’l Gordu en Rozaes (Villaviciosa)

El domingu 11 de febreru celebróse na parroquia de Rozaes (Villaviciosa) el Domingu’l Gordu, ...

Nueves visites guiaes a la esposición “Voces. La llingua al traviés de los sieglos”

Más de 4.000 persones visitaron yá la esposición Voces. La llingua n’Asturies al traviés de ...

Xixón sigue sumando turistes

Xixón rexistra un 1,8% más de viaxeros y un 2,8% más de pernoctaciones nel ...

Berta Piñán gana’l 38 Premiu Xosefa Xovellanos de novela n’asturianu

Berta Piñán ha ganado el Premio Xosefa Xovellanos de novela en asturiano, que concede ...