5 tradiciones navidiegues d’Asturies que van sorprendete

Acercámoste delles tradiciones asturianes d’esti tiempu. Dalgunes tán mui vives y otres viéronse amenazaes por tradiciones introducíes n’Asturies y agora busquen volver a tar presentes nes fiestes de los asturianos y les asturianes.31

En Nuechebona quemamos un tueru: El nataliegu

Una tradición que se da en munchos otros territorios europeos, con distintos nomes y variaciones. N’Asturies tenemos testimoniu de persones entá vives en conceyos como Casu, Grau o Llaviana, que recuerden como nel día de Nuechebona solía echase al fueu un tueru, polo xeneral de carbayu, sobre’l restu del tueru quemáu l’añu anterior, que se guardaba. Esta quema trayía fertilidá a la casa y al ganáu, y defendía énte’l mal. Anguaño ta recuperándose nes cases, cola quema de verdá o sustituyendo ésta por adornos de lluz llétrica alredor del tueru. Vitu Raúl Pintado y Alberto Álvarez Peña asoleyaron un llibru pa promocionar esta tradición ente la reciella “Un nataliegu perbullindiegu” (Trabe, 2017)

Los regalos nun vienen a casa, faense aguilandos

Los regalos nun llegaben a casa enantes, había que salir a buscalos. Grupos de mozos percorríen los pueblos d’Asturies pidiendo l’aguilando peles cases nos díes de Nuechebona, Navidá, Añu Nuevu y Reis. Los rapazos solíen mazcaritase de personaxes de dos tipos: los de la lluz o guapos y los de la escuridá. La xente dába-yos a los rapazos comida, dulces y oruxu. La tradición tán recuperándola colectivos como los Sidros de Valdesoto, Os Reises del Valledor… con gran ésitu.

Nun ponemos l’árbol, sinón el Ramu de Nadal

Esta tradición ta siendo recuperada con puxu en Llión. En llugar del árbol de Navidá, el Ramu de Nadal ye una estructura de madera en forma de triángulu onde se coloquen doce veles, en representación de tolos meses del añu, asina como teles, llazos y hasta dulces colgando delmesmu. Ye un elementu decorativu que paez que tien orixe precristianu.

Tenemos un mensaxeru propiu de los Reis: el Príncipe Aliatar

Delles tradiciones nun tienen tantos años, ye’l casu d’Aliatar, el mensaxeru que n’Asturies recueye les cartes a los Reis Magos nes selmanes previes a la so llegada. Esti personaxe preséntase como Alteza Real col títulu de Príncipe. La figura ta inspirada n’Ibrahim Aliatar o Alí-Atar (- 1483), llider musulmán de Granada na so dómina. Nes cabalgates de Reis siempres abre pasu Reis. El personaxe d’Aliatar creólu nos años cincuenta J.F.B., un periodista uvieín, inspiráu nel nome d’una sala de cine granadina, como él mesmu confesó nos años sesenta.

Equí nun vien Papá Noel, vien L’Anguleru

N’Asturies ta trabayándose na puesta en valor de nueves figures del Nadal. L’Anguleru ye un pescador que trai regalos en Nuechebona a les neñes y neños d’Asturies. El personaxe, creáu pola asociación Garabuxada de L’Arena, ta basáu na tradición pola que los pescadores d’anguila solíen dar regalos a los neños nos díes de Nadal, coincidiendo col aumentu de los sos ingresos pola xuba de l’angula nos mercaos. El personaxe ye cada vegada más conocíu ente los neños, y apaez nes cabalgates y otros actos per Asturies.

Artículos rellacionaos

El Xardín Botánicu de Xixón celebra xornaes navidiegues de puertes abiertes

El Xardín Botánicu de Xixón celebra xornaes de puertes abiertes del 22 d’avientu al ...

Xixón entama unes xornaes de la cocina tradicional

Diecisiete establecimientos ufren del 23 de payares al 2 d’avientu menús coles recetes clásiques ...

Xuan Nel Expósito espubliza’l primer manual pa deprender a tocar la curdión diatónica

La obra compónse d’exercicios, y casi cuarenta partitures de pieces tradicionales asturianes xunto con ...

Trés barcos hestóricos van atracar en Xixón

Répliques de los más célebres navíos de la hestoria, van poder visitase xuntos per ...

Cantares pa la esfoyaza

Una de les celebraciones típiques d’Asturies y qu’agora namás queda d’un manera más bien ...

3 rutes pela costa asturiana pa nun quedar atrapáu na nieve.

Sienda costera del Cabu Peñes La villa de Lluanco ye’l llugar escoyíu pa entamar ...