Arquitectura d’Asturies: Palaciu de Valdés-Bazán (Candamu)

Nel pueblu de San Román, en Candamu, ta’l Palaciu de los ValdésBazán, declaráu Monumentu Hestóricu Artísticu. Dempués de delles décades de deterioru y abandonu, güei en dia ye’l llar de la Casa Cultura y Biblioteca del Conceyu de Candamu, recuperando asina parte de la so digna presencia.
Ye un edificiu compactu, de planta rectangular y dos pisos na mayor parte de la so estructura, sacantes na zona oriental, na que la rimada del terrén amenorga l’altor a un únicu pisu. La fábrica emplegada ye mamposteria, el sillarín y el sillar de piedra nel recercáu de vanos y esquines.
Tol edificiu ta suxetu a una racional organización de los vanos. Nun esiste, amás d’estos, elementos decorativos que dean monumentalidá, como suelen ser común nos palacios asturianos del sieglu XVII, fecha de la so construcción. La fachada principal ye un llenzu plásticamente bien planu, construyíu simétricamente a dambos llaos de la exa que ye la portada principal nel pisu inferior y el balcón referente al salón de la casa nel superior. Son estos los únicos vanos con resalte, llindándose esto a un voladizu de piedra y a un antepechu de fierro nel citáu balcón: a un llau del mesmu allúgase la piedra d’armes de la familia, con representación de les Cases de Valdés, Quirós, Alas y Cuervo (o Cuervo- Arango) n’escudu recortáu sobro tarxeta de cueru, y con orla formada por cañones y soldaos. Na mesma fachada atópase l’otru de los escudos que representa a la Casa de los Cuervu referencia posible a los primeros habitantes de la cortil y a una edificación anterior.

El palaciu de los Valdés– Bazán ye una construcción asitiada nun mediu rural, pero alloñada d’una concepción agrícola tradicional. Nun ye una casona realzada por escudos y por una torre antigua, como tantes vegaes pue contemplase nel nuesu país; pela cuenta tamos énte un palaciu concebíu con un ingrediente novedosu: l’esfrute de la redolada. Enclaváu nun formosu valle – hemos de suponer que nel momentu de la so construcción prácticamente virxe – los sos constructores y quiciabes el deséu espresó de los sos habitantes deciden esfrutar de la vida por aciu la disposición d’una amplia galería de piedra. Esti elementu, la loggia, yá fuera utilizáu sieglos enantes nes villes italianes diseñaes por Bramant, Romano y otros arquitectos de la Renacencia italiana. Tan noble y distinguíu elementu traduzse nun llinguaxe más cenciellu, afaciéndose a técniques y materiales llocales.  Asina, la galería del palaciu apaez como siete arcaes abiertes nos llaos meridional y occidental -la meyor orientación posible- y nos dos pisos del edificiu.

L’arcada del pisu interior ta sostenida por pilastres de sección cuadrada, namás realzaos por una pronunciada llinia d’imposta. Estos arcos al igual que nel pisu cimeru son toos de mediu puntu rebaxaos, anque dalgún d’ellos, especialmente’l que correspuende cola puerta, tengan un perfil próximu al arcu carpanel.
La galería del pisu cimeru ye mas estilizada, sensación esta producida al sustituyir el sofitu en pilastra pol de la columna de cenciellu ábaco que cuelga sobro la balaustrada de piedra que protexe esta estancia del aire. El restu de la fachada meridional entámase como la principal, con balcones perfectamente distribuyíos nel pisu inferior magar el desnivel qu’anula’l pisu terrenal. Ye de destacar, como elementu uniformador, la destacada llinia  d’imposta y la cornisa qu’arrodia tol edificiu, únicu resalte del mesmu. Tamién ye destacable’l trabayu de la madera nos bistechos y na formosa panera con pegoyos del mesmu material que se caltién frente a la fachada principal.

Tags:

Artículos rellacionaos

4 escritores pa conocer requexos d’Asturies 

Una forma guapa de conocer Asturies ye al traviés de los sos escritores. Nesti reportaxe ufrímoste cuatro llugares ...

Los oríxenes de Castrillón, un pocoñín d’hestoria

Asocedió fai munchos, munchos años nun reinu del norte nel qu’había un imponente castiellu, ...

Carreño, la hestoria apasionante d’un conceyu

Percorremos la hestoria de Carreño del Paleolíticu hasta la dómina medieval La presencia humana más antigua ...