¿Cómo celebraben los vaqueiros les fiestes navidiegues?


La conmemoración de la nacencia de Cristu tuvo siempres un ampliu ecu popular n’Asturies. Nestes feches navidiegues solíen rexuntase los vaqueiros d’alzada pa, ente otres coses, cantar les sos tonaes preferíes.

Toca, pandereita, toca,
que te tengo arreventare;
delantre de quien you quixi
nunca quixisti tocare
 

Vaqueiros d’Aristénabo y Busindre, de Rellosu y Las Tabiernas, de Tinéu y de L.luarca, celebraben estes feches a comuña. Na Nuechebona y nel Nadal nes cases de los pastores del oriente d’Asturies -Cabrales, Cangues d’Onís, Ponga…- destacaba siempres la bona mesa. Al mediudía  empecipiábase  les xeres na vieya cocina llariega. Más o menos siempres se repetía esti mesmu menú: Sopa de fégadu encebollao, chorizu picante, corderu asao, fégadu encebollao… too ello acompañao con unes bones cantidaes de lleche cuayao, pa poner a puntu’l cuerpu. Les moces ayudaes polos neños confencionaben moñecos representando al neñu Dios que hasta’l día de Reis, quedaben espuestes nes cases pa la veneración.

Na Asturies occidental los vecinos d’Ibias y Degaña facien el tradicional “tributu al cura” afatiaos con traxe de folixa y portando una pita, una riestra cebolles, una manteca y docenes de güevos. Los cabeces de familia dábense cita nes inmediaciones de la ilesia, empobinando dempués pa escontra la casa rectoral. Ente la puerte deteníense pa cantar:

 
Ñacio, siñor cura, el meyor galán;
ñacio’l neñu en pañales,
y la virxe calecíalu.
Al neñu que ye neñu,
al neñu Xesús.
 

Yá na casa rectaral ofrecíen los presentes al cura, participaben de la bayurosa llacuada y mostraben el so contentu en villancicos.

Tags:

Artículos rellacionaos

Los oríxenes de Castrillón, un pocoñín d’hestoria

Asocedió fai munchos, munchos años nun reinu del norte nel qu’había un imponente castiellu, ...

Bailles d’Asturies: El cariáu

Baille de corru estendíu per gran parte del occidente d’Asturies, en conceyos tan distantes ...

Tinéu, un destín d’oru

El MOA (Muséu del Oru d’Asturies) ta asitiáu nel pueblu de Navelgas (Tinéu), d’unos ...

Valgrande-Payares y Fontes d’Iviernu abren esti llunes la temporada d’esquí n’Asturies

Les estaciones de Valgrande-Payares y Fontes d’Iviernu prepárense p’abrir mañana llunes, 21 de xineru, ...