Conocer Asturies pon en marcha “XixónTours”, un ciclu de visites temátiques guiaes n’asturianu na ciudá

¡INSCRÍBITE YÁ!

La plataforma d’información sobre ociu, viaxes y turismu Conocer Asturies pon en marcha XixónTours, un ciclu de visites guiaes temátiques n’asturianu que van ufrise al públicu a lo llargo del mes d’avientu. 

XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu.

Les rutes de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, puedan ver aspectos estremaos o desconocíos pa ellos. 

Les visites d’esta primer edición del ciclu XixónTours diseñáronles espertos nes cuestiones trataes en caúna de les temátiques de les mesmes, como la hestoriadora, arqueóloga y presentadora del programa “Historias y misterios” de TPA, Arantza Margolles, el músicu y fondu conocedor de la hestoria de Xixón, Daniel García de la Cuesta y el periodista y diplomáu en Turismu, Inaciu Galán. Nesta ocasión van facese trés rutes temátiques:

 

Xixón mete mieu: Una ruta que va averar a los y les visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes que mos van llevar n’horariu nocherniegu a conocer los sitios más escuros, terroríficos y misteriosos de la hestoria de la ciudá de Xixón.

FECHES Y HORARIOS

Miércoles 19, a les 19 hores.
Sábadu 22, a les 19 hores.
[Salida dende la Plaza’l Marqués, xunto a la estatuta Pelayo]

Escritores n’asturianu en Xixón: Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, onde s’estrenaron munches obres d’Eladio Verde, el conventu de Cimavilla onde tuvo Xosefa Xovellanos, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Estos y otros llugares, coles sos hestories, formen parte d’una visita onde lliteratura y hestoria xúntase pa dar a conocer la ciudá.

FECHES Y HORARIOS

Xueves 20, a les 18:30 hores.
Sábadu 29, a les 12 la mañana.
[Salida dende la Plaza’l 6 d’agostu, frente a Correos]

Muyeres na hestoria de Xixón: La muyer, tapecida siempres na hestoria, apruz nesta visita guiada per Xixón. Una visita a la ciudá onde se falará de muyeres importantes na hestoria de la ciudá, como Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González… ensin escaecer a los colectivos de muyeres anónimes que tanto marcaron el carácter d’esta villa, como les cigarreres, les pescaderes…y les tradiciones como la de les comadres, falando del papel de la muyer na sociedá, dende la falta de visibilidá hasta llegar a cuntar con alcaldeses.

FECHES Y HORARIOS

Domingu 23 a les 12 la mañana.
Xueves 27, a les 18:30 hores.
[Salida dende La Escalerona, na playa]

Les visites tienen un costu de 5 euros pal públicu xeneral y 3 euros pa menores de 18 años y grupos escolares o xenerales de más de 15 persones. Ye obligatorio inscribise na páxina web www.conocerasturies.es/xixontours a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu xixontours@conocerasturies.es 

El proyectu xestiónalu Conocer Asturies, al traviés de Cuatro Gotes Producciones y cunta col sofitu de la Oficina de Normalización Llingüística de Xixón.

Artículos rellacionaos

A Conseyeiría d’Educación y Cultura presenta na Caridá el octavo númaro da revista Trabatel

A publicación nacéu como un escaparate prá creación lliteraria actual en gallego-asturiano Trabatel. Revista ...

Pablo Rodríguez Medina gana’l Concuru de Cuentos pola Oficialidá de Bimenes

Pablo Rodríguez Medina (L’Entregu, 1978) foi’l ganador del Concursu de Cuentos pola Oficialidá del ...

Formientu, un espaciu nuevu pa conocer la lliteratura asturiana na rede

La revista lliteraria Formientu, que sal en papel dende l’añu 2006 y ta codirixida ...

Presentose’l diccionariu Etimolóxicu de la Llingua Asturiana (DELLA)

Esti xueves, 15 de marzu, tuvo llugar la presentación del Diccionariu Etimolóxicu de la ...