Educación entama una esposición sobre la historia de la llingua asturiana, nel marcu del programa ‘Covadonga Centenarios’

La muestra va poder visitase nel Muséu Arqueolóxicu d’Asturies ente’l 26 de setiembre y el 14 d’ochobre

La Conseyería d’Educación y Cultura entama una esposición sol nome de Voces. La llingua n’Asturies al traviés de los sieglos, nel marcu del programa « Cuadonga Centenarios ». D’esta manera, la llingua asturiana va tar tamién presente nel programa d’eventos tan ampliu y variáu que’l Gobiernu vien desenvolviendo nel 2018 pa celebrar los trés acontecimientos d’escepcional interés históricu que tienen l’epicentru nel Real Sitiu de Cuadonga.

Asina, enllazando coles actividaes destinaes a conmemorar el XIII Centenariu de los oríxenes del Reinu d’Asturies, la Conseyería d’Educación y Cultura entamó esta esposición, que se va inaugurar nel Muséu Arqueolóxicu d’Asturies el miércoles 26 de setiembre y va poder visitase hasta’l 14 d’ochobre. Va poder accedese a los sos conteníos, amás de n’asturianu, en castellanu y inglés pente medies de códigos QR, mesmo qu’al catálogu xeneral de la esposición.

Un equipu de profesores de la Universidá d’Uviéu, dirixíu por Xulio Viejo Fernández, encargóse d’ellaborar los conteníos d’esta muestra, cola que quier sacase a la lluz la trayectoria, interesante y llarga, d’una llingua con más de mil años d’historia, percorriendo les sos distintes etapes y analizando les cuestiones qu’en cada sector marcaron el so pasáu y presente y proyecten el so futuru nel sieglu XXI.

La rellación del asturianu coles llingües indoeuropees y romániques, l’apaición de los primeros documentos nos que se menta l’asturianu como llingua oral tradicional y propia de la xente d’esti territoriu, los primeros documentos n’asturianu, el desenvolvimientu de la so lliteratura, la minorización o los movimientos sociales pa la so recuperación y revitalización tienen acoyida nos materiales d’esta esposición, onde s’otorgó gran importancia a los elementos gráficos y audiovisuales.

Tags:

Artículos rellacionaos

L’Academia de la Llingua presenta el XXXIX Día de les Lletres Asturianes

Esti xueves, 22 de marzu, tuvo llugar la presentación nel llar de l’Academia de ...

Xixón, en Madrid Fusión

Xixón torna a Madrid Fusión con un estand propiu. La feria más importante de ...

Xuan Santori Vázquez llogra’l Premiu Máximo Fuertes Acevedo d’Ensayu n’asturianu

Xuan Santori Vázquez, resultó ser el ganador de la XXIII edición del Premiu «Máximo ...

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

Bimenes convoca’l XVIII Concursu de Gaita

El Conceyu Bimenes ta acabante de convocar una nueva edición del so concursu de ...