El Parres más indianu

Lo que nel pasáu foi una realidá que marcó la vida de munchos asturianos que vieron na emigración una salida a la escasez de recursos que carecíen diariamente, convirtióse güei nun alcuentru festivu al que Parres y la so redolada nun son ayenos

La situación de desequilibriu y escasez que se vivía n’Asturies derivada del antiguu réxime foi lo que fixo que se punxera tierra pel mediu en busca d’un futuru meyor pa tola familia. A esto sumábase tamién que dende 1835 el serviciu militar yera obligatoriu y munchos mozos prefirieron emigrar a América primero qu’incorporase a files. Cuba foi’l destín principal de los parragueses que decidieron probar suerte.

Acordies colos estudios realizaos, el gran éxodu asítiase ente 1860 y 1930 llegando a algamar una tasa migratoria del 6,1% na segunda década del sieglu XX. De fechu puede asegurase qu’anguaño nun esiste en Parres nenguna familia que nun tenga ente los sos ancestros emigrantes a América. Una prueba d’ello apúrrenla los Llibros de Quintas que recueyen la elevada cantidá d’homes qu’al llegar el momentu del reclutamientu figuren como “ausentes na Islla de Cuba”.

Foi nes primeres décades del sieglu XX cuando empiecen a apaecer na capital del conceyu construcciones llevantaes con capital indianu como’l Xalé de los Valle, Villa Juanita, La Casona, Les Cases de Villa María, la Casa Labra, La Tellería, La Casa d’Amelia Miyares o los Xalés de Castañera. 

Tocantes a l’arquitectura civil tamién esisten numberoses amueses de les riqueces económiques consiguíes a base de trabayu al otru llau del charcu. Fíos, Cuadroveña o Prestín son un claru exemplu que se sumen a panteones y capiella-panteón que reproducen los neo estilos medievales cristianos. 

Toes estes pruebes de la importancia que tuvieron los indianos y la so cultura en Parres medraron nos años cuarenta del sieglu pasáu cola celebración en Les Arriondes del Día d’América enmarcáu nes celebraciones populares de la fiesta n’honor de la Virxe del Carme.

Por ello, Parres celebra cada añu un Festival Indianu al que se sumen con entusiasmu asociaciones, comerciantes y hosteleros y cuenta col sofitu del Conceyu de ParresEl regresu de “los americanos” al conceyu celébrase la última fin de selmana d’agostu. 

Afatiaos pa la ocasión coles tradicionales vestimientes indianes, prendes d’algodón nes que predomina’l blancu, los participantes esfruten d’unos díes memorables. Nun falten el tradicional desfile encabezáu polos ‘haigas’ y acompañáu pol soníu de los mariachis, un mercadín impulsáu pol comerciu llocal, visites guiaes a l’arquitectura indiana y música llatina en directo, ente otros actos. La fiesta que se desenvuelve ente la plaza de Venancio Pando y la del Cañón collecha tal ésitu que yá se consolidó como una cita imprescindible nel calendariu de Parres.

Un personaxe pernomáu: Venancio Pando y Cuervo

Venancio Pando nació na llocalidá parraguesa de Bodes en 1834 y como tantos otros mozos del conceyu viose obligáu a emigrar pa poder tener un futuru. Tres años de duru trabayu convirtióse nun prósperu comerciante que tornó a Les Arriondes ya impulsó la llocalidá non solo construyendo casones y villes, sinón al traviés de donaciones de gran importancia. En 1866 dona’l solar nel qu’agora s’asitia la Plaza del Conceyu y otru nel que se construyiría más tarde la Casa Conceyu. Ye en mayu de 1869 cuando se remite a la Diputación el planu de la plaza, la tasación y midida de los terrenos pa recibir un añu dempués l’axudicación de les obres de construcción del edificiu.

Artículos rellacionaos

Un añu enllenu d’aniversarios hestóricos p’Asturies

2018 ye un añu especial pa Cuadonga (Cangues d’Onís). Conmemórense los centenarios de trés ...

Xuan Nel Expósito espubliza’l primer manual pa deprender a tocar la curdión diatónica

La obra compónse d’exercicios, y casi cuarenta partitures de pieces tradicionales asturianes xunto con ...

Nueves visites guiaes a la esposición “Voces. La llingua al traviés de los sieglos”

Más de 4.000 persones visitaron yá la esposición Voces. La llingua n’Asturies al traviés de ...

Bailles d’Asturies: El cariáu

Baille de corru estendíu per gran parte del occidente d’Asturies, en conceyos tan distantes ...

3 rutes pela costa asturiana pa nun quedar atrapáu na nieve.

Sienda costera del Cabu Peñes La villa de Lluanco ye’l llugar escoyíu pa entamar ...