Formientu, un espaciu nuevu pa conocer la lliteratura asturiana na rede

La revista lliteraria Formientu, que sal en papel dende l’añu 2006 y ta codirixida polos escritores Diego Solís y Claudia Elena Menéndez, pon en marcha agora una nueva iniciativa na rede, la plataforma lliteraria formientu.com, una completa páxina web dedicada a la lliteratura asturiana que va siguir col espíritu orixinal de la revista, sirviendo como ferramienta pa la promoción de los y les autores mozos, pero tamién como un espaciu nel que difundir en xeneral la lliteratura escrita n’asturianu y en gallego-asturianu.

En pallabres del editor y críticu lliterariu Antón García, “pa siguir la evolución lliteraria de lo más nuevo n’asturianu resulta imprescindible Formientu”, y nesi espíritu, l’oxetivu de la nueva plataforma dixital ye convertise nun espaciu imprescindible pa conocer l’actualidá de la lliteratura asturiana.

Cola esperiencia y el nome de Formientu ponse agora en marcha esta plataforma na rede, que ta conformada por una páxina web y presencia nes principales redes sociales (twitter, Instagram y facebook), ufiertando información atractiva, dinámica y continuada, col oxetivu de fomentar l’espardimientu y promoción de les Lletres Asturianes ente la mocedá y col envís d’afalar la creatividá lliteraria y la conocencia de la mesma dende la rede.

Los conteníos d’esta plataforma van permitir conocer les biografíes de los y les autores mozos qu’escriben n’asturianu, con espaciu pa testos de la so producción, noticies, y planes lliterarios, asina como información de los concursos lliterarios y les sos convocatories. La páxina va dir completándose con materiales audiovisuales que que van conformar una viodeteca lliteraria asturiana y amás, n’otra estaya de la mesma, creóse un apartáu que va permitir aumentar l’espaciu pa la difusión de nuevos creadores, asina como cuntar con una hemeroteca onde consultar y descargar en pdf los númberos vieyos de la edición en papel de Formientu, que tarán disponibles de forma completa a lo llargo de los vinientes meses. 

El proyectu xestiónalu la editora de la revista Formientu, Cuatro Gotes Producciones, y cunta col sofitu de la Oficina de Normalización Llingüística de Xixón.

Enllaz a la páxina: Formientu.com

Tags:

Artículos rellacionaos

Temporada de teatru accesible pa persones con discapacidá sensorial y mayores nel Teatru Xovellanos.

El Teatru Xovellanos va ufiertar cuatro produiciones adautaes pa persones con discapacidá sensorial y ...

La llingua asturiana ye oficial n’Europa

La llingua asturiana va protagonizar una selmana temática demientres los actos oficiales de la ...

Berta Piñán gana’l Premiu María Josefa Canellada de Lliteratura Infantil y Xuvenil

La escritora Berta Piñán resultó ganadora de la décima edición del Premiu María Josefa ...

Pista de patinaxe sobre xelu en La Esposición (Avilés)

La programación navidiega pa esti añu n’Avilés, inclúi una pista de patinaxe sobro xelu ...

Manfredo Álvarez moderará la charra”Quini, el sportinguista más grande de tolos tiempos”

La charra, na que participa’l periodista xixonés Juanma Castaño, va tener llugar esti xueves ...