Grau nun ta dientro de los circuitos turísticos internacionales como Niza, Barcelona o Berlín, pero tampoco lo quier tar porque ye ún de los llugares más importantes de pasu pa les persones que tean faciendo’l Camín de Santiagu, qu’a la so vez ye la ruta turística más relevante del norte de la Península Ibérica. Si daquién fai’l Camín Primitivu de la Vía Xacobea tien obligación de pasar pel conceyu moscón y tien el privilexu de conocer les virtúes del territoriu más oriental del occidente asturianu.

Los pelegrinos que vienen d’Uviéu crucen el conceyu de Grau d’este a noroeste y entren nél pela conocidísima ponte de Peñaflor, que ye ún de los vaos más estrechos pelos que se pue cruzar el ríu Nalón y la llende ente los conceyos de Les Regueres, Candamu y Grau. Nun ye d’estrañar la relevancia estratéxica que tuvo esta ponte a lo llargo de la hestoria y les primeres referencies escrites que s’atopen d’ella son del sielgu xii, anque esisten cientos de documentos nos que sal citada, bien pel Camín de Santiagu, bien pela conexón que supunxo siempres ente la zona centro-norte d’Asturies y la suroccidental.

Nel corazón del conceyu atópase la capital, vieya villa cargada de casones y palacios y que ye ún de los centros económicos de la zona, gracies a los sos mercaos selmanales y a la so infinidá d’eventos culturales y festivos. Aveza a dicise que ye imprescindible conocer la capiella de Los Dolores o’l palaciu de Fontela si se pasa per Grau, pero lo cierto ye qu’esos dos edificios solo son una minúscula parte de lo que la capital moscona pue ofrecer a los visitantes. Si’l pelegrín quier tener una noción completa de lo que ye esta villa nun pue pasar sin sentase la plaza Xeneral Ponte, sin conocer el Muséu Etnográficu o sin pisar el vetustu patiu interior del palaciu Valdés-Valdecarzana, ente otros, onde s’ubica la Casa la Cultura y l’Aula de las Metáforas.

El camín sigue dirección Galicia dende Grau capital siguiendo la ruta antigua, enantes de pasar pal conceyu de Salas, anque tamién se pue tomar la carretera N-634, que ye más cómoda, pero menos vistosa. Nesta parte ye onde s’ubiquen los tres albergues públicos de pelegrinos que tien el conceyu moscón, el de La Moratina, el de San Xuan y el de Cabruñana, y ye onde ta’l santuariu d’El Freisnu, famosu centru comarcal de xuntanza de xente, que celebra la fiesta grande los últimos díes de setiembre de cada añu. Esta zona del conceyu pue llamar l’atención a les persones que vienen de fuera d’Asturies pola característica distribución de les finques y los praos con zarráu de piedra que parecen nun distar muncho del sieglu xvi,  época na que s’edificó’l primitivu santuariu.

Munches veces, como dicíemos, rellacionamos el términu turismu coles grandes aglomeraciones de xente de les playes mediterránees y parez que nun esiste otru negociu turísticu mayor que la creación de centros multiactividá qu’axunten la máxima cantidá de persones posible, pero menos mal que non tol mundu tien esta concepción de lo que ye’l tiempu llibre. L’occidente asturianu guarda tovía della hermeticidá en cuantes al turismu de mases y pue ofrecer calidá y precios asequibles a los visitantes que quieran dalgo más que playa, sol y chiringos. Esta ye la forma d’actuar de Grau y nun se sabe si ye causa o consecuencia del Camín de Santiagu: turismu sí, pero con conciencia.

Tags:

Artículos rellacionaos

El Picu Urriellu

El Picu Urriellu ye un picu caliar d’orixe paleozoicu asitiáu nel Macizu Central de los Picos ...

Colunga, ente la mar y el monte

Nun enclave privilexáu d’Asturies, nel centru-oriente y en plenu corazón de la Comarca la ...

Parque Nacional de Picos d’Europa

El Parque nacional de Picos d’Europa (67.455hectárees) ta asitiáu ente les comunidaes d’Asturies, Cantabria ...

El Peñatú, una ayalga neolítica asturiana

Nel estremu más occidental de la Sierra Plana de la Borbolla, y cercanu a ...

Castrillón, “orixe” de la minería del carbón.

Pues lleer esti artículu na Revista ViaxAST 2 Asocedió fai munchos años nun reinu ...

Cuaña, un viaxe al occidente asturianu.

Cuando’l viaxeru entra dende Navia al conceyu de Cuaña, y a pesar d’atopase a ...