Jorge Blass presenta’l so show “Palabra de mago” nel Teatru de la Llaboral

Jorge Blass trai a Xixón el so nuevu show Palabra de mago, que va representar el vienres 23 a les 20:30 hores, y el sábadu 24 de marzu, a les 18:00 hores, nel Teatru de la Llaboral.

Nel so nuevu espectáculu Jorge Blass esplora mientres hora y media la esencia de la maxa, actualizando al sieglu XXI l’arte del ilusionismu. Yá nun s’utilicen coneyos o varitas máxiques, sinón tablets o teléfonos móviles, con una puesta n’escena actual na que tamién s’empleguen proyecciones audiovisuales.

Ganador de la “Varita Mágica de Oro” en Mónaco y el premiu “Siegfried and Roy” en Les Vegues, Blass presentó los sos espectáculos en llugares emblemáticos como’l Kodak Theater de Los Ánxeles o la Exposición Universal de Xangai. En televisión participó en Nada x aquí de Cuatro, Por arte de magia d’Antena 3, Now you see it de la BBC o Next great magician de la cadena inglesa ITV.

Impartió charres n’Europa y América sobre cómo aplicar principios máxicos al mundu de la empresa y ye autor de los llibros Magia para no dejar de soñar y La fuerza de la ilusión. Amás apocayá collaboró con David Copperfield, que-y mercó los derechos d’una ilusión inventada por Blass pal so show n’Estaos Xuníos.

Les entraes, a un preciu de 18 y 22 euros, pueden adquirise na Recepción de la Llaboral, nel Centru Niemeyer d’Avilés, na Oficina d’Información Turística d’Asturies (CITPA) n’Uviéu, na web entraes.liberbank.es, nel teléfonu 902 106 601 y na rede de caxeros Liberbank.

Tags:

Artículos rellacionaos

4 compañíes asturianes pa conocer el panorama del teatru n’asturianu

Asturies tien una montonera compañíes de teatru qu’usen l’asturianu nes sos representaciones. Dende’l teatru ...

“Muyeres Insesperaes” estrénase’l xueves 14 nel Teatru Xovellanos

“MUYERES INESPERAES” ye  la obra teatral de Dolfo Camilo Díaz que s’estrena nel Teatru ...