La llingua asturiana ye oficial n’Europa

de la manzorga a la mandrecha apaecen Garbiñe Iztueta (País Vascu), Sara Seco (Galicia), Judith Scholze y Anna Walther (Sorabia), Flavia (Asturies), Mirjam (Frisia), Vérval (Asturies), Guillem Belmar (Cataluña) y Asier Basurto (País Vascu).

La llingua asturiana va protagonizar una selmana temática demientres los actos oficiales de la capitalidá europea de la cultura nos Países Baxos. Anque yá fuera reconocida como oficial, principalmente dende l’informe que la UNESCO realizara en 2009, la llingua asturiana ta considerada nos Países Baxos como un importante referente a protexer dada la so relevancia histórica y la gran cantidá de producción cultural qu’ufierta, mui per enriba d’otres llingües europees yá oficiales.

La selmana asturiana foi posible gracies a la Fundación Afûk, responsable del proyectu de les llingües nos actos de la capitalidá europea, y ta siendo coordinada por Iria Rodríguez y Carlos Díaz (Flavia y Vérval, conocíos pol grupu musical “Xera”), que lleven yá dos años viviendo nos Países Baxos y cuasi ocho desendolcando rellaciones culturales con organizaciones en defensa de la llingua frisia. La llingua asturiana va contar, poro, con una selmana propia igual que’l vascu, el gallegu, el corsu, el friulianu, el maltés, el serbiu y el gaélicu, entre otres.

Nesta xera, Vérval y Flavia tán contando col sofitu de la organización “Iniciativa pol Asturianu”, que yá entamó la so participación na capitalidá al traviés de la campaña “les diez pallabres favorites n’asturianu”. La organización collaborará nesa selmana con una ponencia alrodiu la situación actual de la llingua y con materiales pa la so promoción.

D’otra miente, la selmana va contar con ambientación mitolóxica de la mano d’Alberto Álvarez Peña (etnógrafu, dibuxante y miembru de la Fundación Belenos), actividaes infantiles apurríes pol coleutivu “Reciella”, una escoyeta de producción musical asturiana al cargu de la empresa “musicasturiana.com”, tres conciertos de “Xera – Raíz”, una amuesa d’indumentaria tradicional apurría pola Banda Gaites “La Raitana” y un puestu informativu de la Oficina de Turismu del Principáu d’Asturies.

Esti xueves pasáu, 27 d’abril, les delegaciones asturiana, gallega, vasca, serbia y de Frisia oriental presentaron los conteníos pa les sos respectives selmanes. Demientres los actos, presentáronse tamién los conteníos de Malta, Cornualles, Islla de Man y Friuli.

Páxina web de AFÛK: http://afuk.frl/

Llocalización del asturianu dientro’l programa (mes de agostu, idioma neerlandés): http://afuk.frl/agenda?language=nl

Artículos rellacionaos

Xixón pieslla’l cuatrimestre primeru con más turistes que nunca

115.410 persones agospiáronse nos hoteles de la ciudá asturiana nos cuatro meses primeros del ...

Un antroxu “Dándole vueltas al disfraz”

El concursu entamáu por Divertia pa escoyer un cartelu col qu’ilustrar l’Antroxu de Xixón, ...

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

Bimenes convoca’l XVIII Concursu de Gaita

El Conceyu Bimenes ta acabante de convocar una nueva edición del so concursu de ...