La Reciella de la Factoría programa cuatro actividaes infantiles pal primer semestre de 2018

Van entamar el 9 de febreru col espectáculu de marionetes La neña de les trences al revés, de la compañía El Callejón del Gato.
Toles actividaes van desenvolvese na Factoría Cultural, a les 19 hores, con entrada llibre hasta completar aforu

La programación del ciclu La Reciella de la Factoría pa la primer metá l’añu inclui cuatro actividaes infantiles. Les neñes y los neños d’Avilés podrán disfrutar d’espectáculos de marionetes, teatros de sombres, canciones y cuentacuentos en llingua asturiana.

La primer cita ye pal vienres 9 de febreru, cola representación del espectáculu de marionetes La neña de les trences al revés, a cargu de la compañía El Callejón del Gato.Trátase d’una obra que tien como puntu de partida’l cuentu col mesmu nome escritu por Iris Díaz Trancho.

El vienres 23 de marzu sedrá’l turnu del grupu de teatru de sombres El Turnebís del Tribilín, encargáu de representar Cuentos y lleendes. Ye un espectáculu con música en direutu, basáu en cuentos y romances recoyíos de la tradición oral. Per otru llau, el 20 d’abril van sonar Canciones infantiles, interpretaes en direutu pol Coru la Reciella del Conservatoriu Julián Orbón, cola direición de la profesora Isabel Baigorri Sáenz.

La programación de La Reciella de la Factoría para este primer semestre de 2018 termina’l vienres 11 de mayu, cola actividá de cuentacuentos Valentina quier un pexe, a cargu de la actriz y tamién autora del cuentu, Olga Cuervo.

Toles actividaes empiecen a les 19:00 hores nel Espaciu Escénicu de la Factoría Cultural d’Avilés (Avenida de Portugal, 13) y sedrán d’entrada llibre y de baldre, hasta completar aforu. Nun se va poder entrar na sala n’entamando les representaciones.

El ciclu La Reciella de la Factoría ta organizaú pola Estaya de la Llingua en collaboración cola asociación Reciella Families pol Asturianu. Ta dientro la programación que’l Conceyu d’Avilés entama tolos años pa normalizar la llingua asturiana ente les xeneraciones más moces.

Programación de La Reciella de la Factoría Primer semestre 2018
  • 9 de febreru 19 hores. La neña de les trences al revés, por El Callejón del Gato. Un espectáculu de marionetes que tien como puntu de partida’l cuentu de la escritora Iris Díaz Trancho.
  • 23 de marzu 19 hores. Cuentos y lleendes, por El Turnebís del Tribilín. Teatru de sombres con música en direutu, basáu en cuentos y romances recoyíos de la tradición oral.
  • 20 d’abril 19 hores. Canciones infantiles, pol Coru de La Reciella. Canciones infantiles interpretaes pol coru La Reciella del Conservatoriu Julián Orbón, dirixíu pola profesora Isabel Baigorri Sáenz.
  • 11 de mayu 19 hores. Valentina quier un pexe, de Olga Cuervo. Cuentacuentos a cargu de l’actriz y tamién autora del cuentu, Olga Cuervo.

Tags:

  • Conseyu de redacción de Conocer Asturies. redaccion@conocerasturies.es

Artículos rellacionaos

V Salón d’agroalimentación y turismu del Arcu Atlánticu

Un grupu de productores de les rexones atlántiques españoles va ufiertar los sos productos ...