El Club Xeitu acaba de publicar n’una cuidada edición la ‘Hestoria de la mia vida’, llibru de memories de la escritora Eva González, coincidiendo col centenariu de la so nacencia. Na obra, que s’asoleyada de forma póstuma, l’autora rellata en primer persona la so trayectoria vital, centrándose nos años tráxicos de la Guerra Civil, que marcaron la so vida. A los testos orixinales escritos na variedá del asturllionés de la so zona, súmase la traducción al castellán.

Eva González terminó d’escribir esta ‘Hestoria de la mia vida’ en 1988. Ye una obra de gran calidá lliteraria, qu’en determinaos momentos resulta dura y dramática, anque esta durez nun tien de faenos escaecer la inolvidable dulzura de los sos poemes y cuentos yá publicaos.

Eva González (Palacios del Sil, 1918-2007) ye autora d’una estensa obra poética y narrativa. Les sos primeres obres integren la serie “Na nuesa tsingua”, escrita ente 1980 y 1990 en collaboración col so fíu Roberto González-Quevedo. Darréu espublizáronse los sos llibros ‘Poesía completa’ (1991), ‘Cuentos completos’ (2008) y ‘Pequena enciclopedia de nós’ (2011), esta postrera tamién espublizada pol Club Xeitu. Ye tamién autora de numberosos artículos y collaboraciones en periódicos y revistes.

La edición d’esti llibru, que ve la lluz cola collaboración del Instituto Leonés de Cultura, cuenta con un prólogu d’Irma González-Quevedo Pedrayes, ñeta de l’autora y escritora. De les notes y de la traducción al castellán encargóse’l fíu de l’autora, el profesor, etnógrafu y escritor Roberto González-Quevedo González.

Tags: