La XVI Seronda n’Avilés estrena allugamientu na plaza Hermanos Orbón / plaza de Les Aceñes

Nesta nueva edición dase tovía más puxu a les actividaes empobinaes a neños y neñes en “La Reciella na Seronda”, con talleres creativos, xuegos populares y animación a cargu d’Olga Cuervo y David Varela
La música sedrá protagonista con sesión vermú’l vienres, baille y danza tradicional, y l’actuación de bandes de gaites y grupos folk
Na plaza tamién se van poner puestos con productos ecolóxicos y artesanos
Yolanda Alonso, conceyala de Cultura d’Avilés, xunto a José Federico Álvarez, José María Villaboy y Marisa Luque, presidente, tesorero y secretaria de la Federación Xuntanza Avilés, y Montserrat Machicado, responsable de la Estaya de la Llingua d’Avilés

La seronda xunta dalgunos de los pegoyos tradicionales n’aldea asturiana. Tiempu de dir a la gueta, guardar mazana y maíz, facer sidra… Avilés mueve’l maxín, naguando y puxando pola conocencia de les costumes vieyes, calteniendo vivu’l so raigañu pente toles xeneraciones. Asina, tolos años, y yá van 16 ediciones, festéxase la Seronda n’Avilés. Esti añu estrénase’l sitiu onde va tar, na plaza Hermanos Orbón, o como se conoz tradicionalmente, la plaza Les Aceñes, nos díes 26 (vienres) y 27 (sábadu) d’ochobre, tol día. 

Entamada pola conceyalía de Cultura per aciu de la Fundación Municipal de Cultura y la Estaya de la Llingua, en collaboración con Xuntanza Avilés, asina como col Mercáu Ecolóxicu y Artesanu y Asociación Cultural Piniella, esta nueva edición presentóla güei pela mañana Yolanda Alonso, conceyala de Cultura d’Avilés, José Federico Álvarez, José María Villaboy y Marisa Luque, presidente, tesorero y secretaria de la Federación Xuntanza Avilés, y Montserrat Machicado, responsable de la Estaya de la Llingua d’Avilés. 

La XVI Seronda n’Avilés llega cargada de novedaes. La primera, el cambiu de sitiu, pasa de la plaza Álvarez Acebal a la plaza Hermanos Orbón, o plaza de Les Aceñes. Pero tamién con un refuerzu especial de les actividaes pa neñes y neños, que son finxos básicos pa siguir calteniendo les tradiciones. Van tener un sitiu propiu en “La Reciella na Seronda”, en tola Plaza. 

La programación d’estos dos díes siguíos fízose pensando en tol mundu. 

Música popular, animación, chigre, productos de seronda (sidra, castañes, tortos…), cuentos, lleendes, sones y cantares tradicionales, muestra de bailles, gaites, pandereteros, folk asturianu, contumes (amagostar castañes, facer sidra…), mercáu ecolóxicu y artesanu y comida popular (pote de berces y arroz con lleche)…Too marcao con un tastu bien asturianu. El xaréu va sentise per tola Plaza, con espacios diferentes nos que se van desenvolver les propuestes preparaes pa pasalo mui bien. 

El vienres pela mañana va dedicase a lo trabayao coles escueles d’Avilés. Güei a última hora de la tarde fállase’l premiu del Concursu de Carteles de Seronda, con un xuráu que preside’l pintor Favila, y l’alumnáu de la escuela ganadora sedrá l’invitáu pa participar na Seronda’l vienres 26 pela mañana. 

El programa infantil incluye talleres creativos, como “Fia la to chapa”, “Pinta y diseña la to obra”, “Recicla cola seronda” y “Crea la to mascota”; tamién xuegos populares, como la rana, cuerda, carrera de panoyes o piesca de la botella; van vivir una esfoyaza y recibir castañes y sidra del duernu. Amás, l’actriz Olga Cuervo y el músicu David Varela van encargase de l’animación, dende les 11 hores. 

La música tendrá munchu protagonismu, y yá entama’l vienres na sesión vermú a sentise cola banda “Los Gascones”, a les 13 hores, que van repetir el sábadu a la mesma hora. El folk, la gaita, el baille y la danza tradicional tarán siempre presentes. La nueche del vienres sedrá del baille, cola “Nueche en Danza”, dende les 22:30 hores, y la del sábadu, a la música, con “A mover la patuca”, dende les 22:00 hores, coles actuaciones de Serendén y el Koku la mazana. 

Na plaza habrá puestos del Mercáu Ecolóxicu y Artesanu, con xente artesano trabayando en vivo. 

Y nun va faltar el sábadu la Xinta popular. A un preciu de 5 euros podrá disfrutase de pote de berces y arroz con lleche, dende les 14.30 hores.

Otra novedá, ye que’l sábadu pela tarde hai teatru costumista asturianu, en “¡A escena!”, cola actuación del Grupu Garrapiellu, de Piarnu, a les 18:30 hores. Van representar la obra “La criada de tayuela”. 

La inauguración oficial de la Seronda sedrá’l vienres a les 19:30 hores, cola actuación de la banda de gaites El Trasno, de Coaña. 

Programa XVI Seronda n’Avilés

Vienres 26 d’ochobre

La reciella na seronda

  • 11 hores. A ponese con arte a ello! Xugando y creando.
  • 12.30 hores. ¡Magüestu y folixa! Animación, esfoyaza y entrega premios del Concursu carteles de Seronda. Compañía OLGA CUERVO.
  • 13 hores. ¡Pa dir metiéndonos en farina!, a ritmu de la bandina LOS GASCONES.

Güel a castañes y a sidra. Entama la Seronda

  • 19 hores. Artesanía y productos gastronómicos caseros. MERCÁU ECOLÓXICU Y ARTESANU.
  • Productos serondiegos: sidra, castañes, tortos…. ASOCIACIÓN CULTURAL LA PINIELLA.
  • Vezos y costumes: “Faciendo sidra y magostando castañes”.
  • 19.30 hores. Inauguración oficial de la “XVI SERONDA N´AVILÉS”.
  • Actuación de la BANDA DE GAITAS EL TRASNO, COAÑA .

Al son de la memoria

  • 20.30 hores. Muestra de bailles y cantares tradicionales, ESCONTRA’L RAIGAÑU.
  • 21.30 hores. Taller de baille y danza tradicional. LUIS ÁNXEL FDEZ. SANTOS, ganador del concursu de baille de pareyes de la “Muestra Folklórica Ciudad de Oviedo”.

Arranca la NUECHE EN DANZA . “Si quies participar val con tener gana de baillar y si quies ¡¡tamién de tocar!!”

  • 22.30 hores. Actuación de MÚSICOS POPULARES.
  • Grupu de pandereteros LOS XEITOSOS.
  • Post-folk asturianu col dúu musical L-R.
  • 0.30 hores. Pieslle.

Sábadu 27 de ochobre

Siguimos cola Seronda

  • 12.30 hores. Artesanía y productos gastrónomicos caseros, MERCÁU ECOLÓXICU Y ARTESANU.
  • Productos serondiegos: sidra, castañes, tortos… ASOCIACIÓN CULTURAL LA PINIELLA.
  • 13 hores. ¡Pa dir metiéndonos en farina”, a ritmu de la bandina LOS GASCONES.

Tiempu de manducar

  • 14.30 hores. Xinta popular: Pote de berces y arroz con lleche.

¡A escena! teatru costumista

  • 18.30 hores. “La criada de Tayuela”, d’Eladio Verde, GRUPU GARRAPIELLU (Piarnu).

Al son de la memoria

  • 20.30 hores. Muestra de bailles y cantares tradicionales, XARÉU D’OCHOBRE.

A mover la patuca

  • Grupu folk, SERENDÉN.
  • Bandina, EL KOKU LA MAZANA.
  • 0.30 hores. Pieslle hasta la Seronda que vien.

Tags:

Artículos rellacionaos

Presentación del cuentu “Un Nataliegu perbullindiegu” nel Acuariu de Xixón

A les 12:30h. Preséntase´l cuentu navidiegu “Un Nataliegu perbullindiegu” nel Acuariu de Xixón. Nel ...

La hestoria d’Ayer, en Playmobil

Una esposición que recrea distintos momentos de la hestoria del conceyu con figures de ...

Esti xueves presentación del atles ETLEN nel edificiu históricu de la Universidá d’Uviéu

L’atles ETLEN estudia la frontera ente los dominios llingüísticos gallegoportugués y asturlleonés, na faza ...

IX Xornaes culturales “De castilletes y carbón”

Per novenu añu consecutivu, la Fundación Nuberu y l’Ayuntamientu de Llangréu organicen les xornaes ...