L’Academia de la Llingua presenta el XXXIX Día de les Lletres Asturianes

Esti xueves, 22 de marzu, tuvo llugar la presentación nel llar de l’Academia de la Llingua Asturiana del actu institucional del XXXIX Día de les Lletres Asturianes que se celebrará’l vienres, 4 de mayu, nel Teatru Campoamor d’Uviéu. Nesta rueda de prensa intervino’l presidente de l’ALLA, Dr. Xosé Antón González Riaño, xunto col diseñador del cartel d’esta edición, Santiago Fano.

Nel trescursu de la mesma, diose anuncia de la propuesta de les nueves académiques correspondientes que sedrán acoyíes esi día nel actu del Teatru Campoamor: la Dra. Margarita Fernández Mier y la Dra. Isabel Hevia Artime, profesores de la Universidá d’Uviéu.

Margarita Fernández Mier (Uviéu, 1966) ye doctora n’Historia y Profesora Titular del Departamentu d’Historia de la Universidá d’Uviéu. Collaboradora de l’Academia, destaquen los sos trabayos sobre documentación medieval asturiana asoleyaos na colección «Fontes de la Llingua Asturiana» y na revista Lletres Asturianes, asina como estremaos trabayos de toponimia de parroquies de los conceyos d’Uviéu y Miranda. Participa davezu como docente na Universidá Asturiana de Branu (UABRA) y nes Xornaes Internacionales d’Estudiu entamaes pola ALLA.

Isabel Hevia Artime (Antromero, 1982) ye doctora en Pedagoxía y profesora del Departamentu de Ciencies de la Educación de la Universidá d’Uviéu, del que ye, amás, Secretaria. Dende l’añu 2007 ye Vicepresidenta de l’Asociación Asturiana de Pedagoxía. Collaboró como investigadora nos estudios sociollingüísticos fechos en Lleón y Zamora y asoleyaos pola Academia dientro de la colección «Estaya sociollinguística», asina como con dellos artículos na revista Lletres Asturianes sobre aspectos de les actitúes de los xestores docentes y del alumnáu, asturianu y autóctonu, pa col asturianu. Participa tamién como docente na Universidá Asturiana de Branu (UABRA) y como ponente nes Xornaes Internacionales d’Estudiu entamaes pola ALLA.

Nesta presentación de Día de les Lletres Asturianes, destacóse asina mesmo la collaboración del Conceyu d’Uviéu, qu’al traviés de la so Fundación Municipal de Cultura vien sofitando nestos años la organización d’esti día y la edición de la revista Lliteratura, qu’inxertará nesti númberu 34 de 2018 una esbilla de la poesía moza fecha n’Asturies.

El Presidente de l’ALLA quixo destacar tamién de mou especial la novedá que representa la collaboración musical qu’esti añu correrá a cargu del cantautor asturianu Nacho Vegas que, xunto col coru “Al altu la lleva”, faerá un percorríu pol so reportoriu de música asturiana y n’asturianu como pieslle del actu nel Teatru Campoamor.

  • Conseyu de redacción de Conocer Asturies. redaccion@conocerasturies.es

Artículos rellacionaos

Xixón, en Madrid Fusión

Xixón torna a Madrid Fusión con un estand propiu. La feria más importante de ...

Un rally de 1.000 kilómetros ente Sevilla y Xixón

Sevilla – Xixón en moto, mil kilómetros d’aventura en tres etapes: gastronomía, contrastes de ...

Domingu’l Gordu en Rozaes (Villaviciosa)

El domingu 11 de febreru celebróse na parroquia de Rozaes (Villaviciosa) el Domingu’l Gordu, ...

Carlos Alba gana’l I Premiu «Nel Amaro» de Teatru Profesional

Carlos Alba resultó ganador de la primer edición del Premiu“Nel Amaro”de Teatru Profesional en ...