Los oríxenes de Castrillón, un pocoñín d’hestoria

Asocedió fai munchos, munchos años nun reinu del norte nel qu’había un imponente castiellu, el Castiellu de Gauzón, dende onde podía divisase’l mar Cantábricu. Yera una fortaleza de reis y soldaos, d’orfebres y artesanos que fabricaben armas, ferramientes y ayalgues.

El castiellu fúndase en dómina visigoda, nos sieglos VI-VII d.C. Foi un asentamientu lligáu a una clas social puxante que xugó un protagonismu perimportante na formación del Reinu d’Asturies. Nel añu 908, los reis Alfonsu III y Ximena ordenaron fabricar na fortaleza la Cruz de la Victoria, actual símbolu presente na bandera d’Asturies.

Nel añu 1222, el rei Alfonsu IX dona’l castiellu a la orden de Santiagu entamando asina un períodu de declive nel que surden conflictos militares. La fortaleza  pierde’l so poder políticu y les sos muries entamen a esbarrumbar. Hasta que nel sieglu XV la fortaleza abandonada cai nel escaezu. O quiciabes non…

El Castiellu de Gauzón,  asiatiáu na llocalidá de Raíces, tien güei un nuevu puxu. Nel añu 2007, el Conceyu de Castrillón entama un proyectu de recuperación que dio los sos frutos. Les escavaciones arqueolóxiques permitieron recuperar muries de les construcciones, úniques nel norte d’España: la muria, la puerta d’entrada coles sos torres, l’alxibe, el palaciu de los reis d’Asturies, el cementeriu de la ilesia dedicada a San Salvador… Nel mesmu tiempu de la campaña de escavaciones faense visites para conocer los trabayos arqueolóxicos. Asina, los visitantes podrán ver los oríxenes del Reinu d’Asturies y les costumes de la época medieval.

Castiellu de Gauzón. Cuartos del palaciu de los reis d’Asturies (Semeya: Iván Muñiz)

Na rodiada, el viaxeru podrá descubrir tamién el Monesteriu de Santa María de Raíces, fundáu nel sieglu XV, únicu eremitoriu franciscanu y mercedariu d’Asturies y una de les primeres sedes del Conceyu de Castrillón. El tercer sábadu de cada mes, dende xunetu hasta ochobre,  podremos recorrer los puestos del mercáu ecolóxicu y artesanu nel que, amás de mercar les meyores productos de la güerta asturiana, podremos prebar una bona cerveza artesana con cuñu astur, ver a neños y neñes xugando na plaza, escuchar un conciertu nun espaciu privilexáu o charrar.


Monesteriu de Santa María de Raíces (semeya: Iván Muñiz)

Amás, dende fai dos años, el conxuntu hestóricu cunta con un nuevu aliciente. La primer fin de selmana de setiembre celébrase la Selmana Medieval del Castiellu de Gauzón, que xunta conferencies, recreación hestórica, música medieval y visites guiaes.

Selmana Medieval del Castiellu de Gauzón (Semeya: Iván Muñiz)

 

Por esto y munches coses más, Castrillón ye “orixe”, ye hestoria y futuru, tradición y modernidá a orielles del Cantábricu. Ven a conocenos, de xuru  qu’equí vas atopar el to llugar nel mundu.

 

Artículos rellacionaos

Carreño, la hestoria apasionante d’un conceyu

Percorremos la hestoria de Carreño del Paleolíticu hasta la dómina medieval La presencia humana más antigua ...

Arquitectura d’Asturies: Palaciu de Valdés-Bazán (Candamu)

Nel pueblu de San Román, en Candamu, ta’l Palaciu de los Valdés–Bazán, declaráu Monumentu Hestóricu Artísticu. Dempués ...

4 escritores pa conocer requexos d’Asturies 

Una forma guapa de conocer Asturies ye al traviés de los sos escritores. Nesti reportaxe ufrímoste cuatro llugares ...

Lleguen les ánimes pel occidente

La seronda n’Asturies ye tiempu de vivos y bien vivos, pero sobremanera na parte ...

Cimavilla, el Xixón de los playos

Dicen los playos que l’auténticu espíritu xixonés ta nel barriu Cimavilla y que tolo ...

Cantares pa la esfoyaza

Una de les celebraciones típiques d’Asturies y qu’agora namás queda d’un manera más bien ...