El Muséu de la Gaita, peslláu por obres

La Casa de los González de la Vega, qu’alluga’l Muséu de la Gaita de Xixón, permanez pesllada al públicu dende’l martes día 7 de payares por obres.

Cola inauguración del nuevu Edificiu de Servicios Múltiples del Muséu del Pueblu d’Asturies el 18 de mayu de 2016 quedaron llibres, na planta cimera de la Casa de los González de la Vega, dos sales qu’agora s’afadrán para ampliar la esposición permanente d’instrumentos musicales del muséu.

La primer fase d’esta intervención va consistir na reforma de los nuevos espacios para afaelos a sales d’esposiciones: apertura de nueves puertes y meyora de suelos y parés. Mientres esta fase desmontará la esposición d’instrumentos musicales qu’anguaño s’esibe.

La siguiente fase, que se va executar en 2018, va consistir na instalación d’una nueva sala dedicada a los instrumentos musicales mecánicos y a los reproductores sonoros que, dende’l postreru cuartu del sieglu XIX, fueron incorporándose a la sociedá asturiana, exerciendo gran influencia sobre la música popular del momentu y trayendo nuevos xéneros bailladeros y cantables que los músicos tradicionales fueron incorporando a los sos repertorios. Anguaño esta sección del Muséu del Pueblu d’Asturies ta formada por cuatro sales: 1. Gaites del mundu. 2. Gaites barroques y gaites sumíes de los Países Baxos. 3. Gaita asturiana y 4. instrumentos de la música tradicional asturiana (carraques, castañueles, panderetes y pandeiros, tambores, xiples, viguilinos, agordones, zanfoníes, etc.).

Na nueva sala que se va abrir en 2018 van esponese bienes culturales adquiríos nos últimos años y n’especial procedentes del numberosu depósitu de fonógrafos, gramófonos, tocadiscos, radios, etc. realizáu en 2015 por Avelino Fombona Álvarez. Esti nuevu espaciu vien completar la visión de la música popular asturiana que’l muséu ufierta al públicu, enantes centrada en preseos de producción artesanal, pa incorporar la sonoridá de la era de la industrialización y amosar los cambeos de la sociedá asturiana.

A lo último, el nuevu percorríu espositivu va concluyir con un espaciu nel que va poder vese un audiovisual que va amosar al públicu músicos tocando los distintos instrumentos que pueden contemplase na esposición.

Tags:

Artículos rellacionaos

Formientu, un espaciu nuevu pa conocer la lliteratura asturiana na rede

La revista lliteraria Formientu, que sal en papel dende l’añu 2006 y ta codirixida ...

4 compañíes asturianes pa conocer el panorama del teatru n’asturianu

Asturies tien una montonera compañíes de teatru qu’usen l’asturianu nes sos representaciones. Dende’l teatru ...

Vuelven a difundir el programa Mundu Sidreru en TPA

TPA emite esti programa que mos permite conocer con fondura los secretos de la ...

A Conseyeiría d’Educación y Cultura presenta na Caridá el octavo númaro da revista Trabatel

A publicación nacéu como un escaparate prá creación lliteraria actual en gallego-asturiano Trabatel. Revista ...

Xixón, finalista de los Premios Travelguau como meyor destín dogfriendly

Xixón foi seleicionáu pola campaña ‘Xixón, yes mi can’ y pola so ufierta bayurosa ...