PlayPresta, la plataforma de youtubers asturianos, suma más de 150.000 espectadores

La canal, que lleva dende finales de 2017 emitiendo los sos primeros espacios, suma yá más de 150.000 espectadores

Nestos díes tan arrancando les nueves temporades de dellos programes de la plataforma

Nestos tiempos nos que’l consumu televisivu faise cada vegada más al traviés de plataformes de conteníos colgaos na rede, ta acabante nacer un proyectu que quier convertise en referente pa la mocedá n’Asturies, PlayPresta. Los sos creadores defínen esta plataforma como “una ventana al mundu de la nuesa xeneración, un espaciu pa entender qué ta pasando dende una perspectiva diferente”.

La canal, que s’asemeya al modelu d’otres creaes nel ámbitu estatal como Flooxer o Playz, arrancó en pruebes con dellos espacios a finales del añu pasáu y va dir medrando en conteníos a lo llargo del añu 2018 hasta ufrir una parrilla variada de programes a lo llargo de tola selmana.

Los programes van colgándose cada selmana y traten temes varios pensaos pal públicu mozu, pero que lleguen a distintes xeneraciones y a públicos con gustos estremaos.

Na plataforma, que pue vese en Facebook, YouTube o na páxina web www.playpresta.com, amás de n’Instagram y Twitter, pueden atopase yá les primeres temporaes de programaes de calter cultural como Museos d’Asturies, un perrcorríu que convida a visitar estos espacios en poco más d’un minutu o La cla invisible, onde la escritora Laura Marcos mete en gana pa la llectura de llibros n’asturianu, a los que se sumen otros pensaos pal entretenimientu.

Nos vinientes meses tán preparándose programes nuevos que van poder esfrutase de baldre na canal que ye yá un referente del mundu youtuber n’Asturies.

Destacamos darréu los cuatro programes más vistos nestos primeros meses de la canal:

Lo más visto de PlayPresta

El fenómenu Hortensia

L’humor tien el so espaciu nesta canal y Hortesia, poeta asturiana convirtióse colos sos monólogos y cantares nel espaciu más vistu de PlayPresta. El personaxe d’Hortensia ye’l d’una poeta xubilada que cuenta les sos vivencies y analiza l’actualidá dende’l so puntu de vista, con un humor ácidu y directu. La so versión del cantar Alejandro, de Lady Gaga, dedicáu a Cuadonga, tuvo una gran difusión nes redes sociales.

Les #Tendencies de Maggy

La moda llega a PlayPresta de la mano de Maggy col so programa #Tendencies. Nel espaciu analiza distintes estayes del diseñu y la moda, con tiempu pa crear y encamentar looks y falar de lo que se ta llevando na moda prêt-à-porter.

Viaxando pel mundu

L’espaciu Viaxando, onde dellos collaboradores visiten ciudaes y llugares del mundu, tuvo na primer temporada a ciudaes como Porto, Viena, Bratislava o la islla de Lanzarote. Pa la segunda temporada, que tará ensiguida n’emisión, tán previstes ciudaes como Praga, Londres, Madrid o Roma, ente otres.

¡El Cosplay… presta!

Shiro Ychigo, una de les cosplayers con más siguidores n’Asturies, y ganadora de numberosos certámenes d’esta afición que gana cada añu más siguidores, presenta’l programa CosplayPresta, nel que mos introduz nun mundu nel que los personaxes de dibuxos aniamos, cómic y videoxuegos cobren vida.

Tags:

Artículos rellacionaos

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

Última selmana de matrícula pal cursu de branu “Xestión cultural n’Asturies”

Esti mes d’agostu y dientro del programa de la Univerasidá Asturiana de Branu (UABRA), ...

La prueba cicloturista “Ruta Vía de la Plata Non-Stop” saldrá de Xixón

Xixón – Sevilla en bici per 962 kilómetros de distancia y un desnivel acumuláu ...

Xixón, en Madrid Fusión

Xixón torna a Madrid Fusión con un estand propiu. La feria más importante de ...