El Principáu impulsa una nueva edición de la Xunta d’Escritores, depués de trece años ensin celebrase

Villaviciciosa acueye el 28 y 29 d’ochobre meses de debate, presentaciones, homenaxes y otres actividaes sobre la lliteratura n’asturianu y gallego-asturianu

El director xeneral de Política Llingüística y Normalización, Fernando Padilla, presentó güei en Villaviciosa la VII Xunta d’Escritores Asturianos, que se va celebrar na villa maliaya esta fin de selmana, 28 y 29 d’ochobre. Padilla, que tuvo acompañáu pol alcalde de Villaviciosa, Alejandro Vega, destacó la necesidá d’esti alcuentru, tres de 13 años ensin convocase depués del postreru d’estes característiques, celebráu en Llanes nel 2004. Al cumplise 30 años dende la primera Xunta d’Escritores, qu’acoyó Villamayor, la Conseyería d’Educación y Cultura y el Conceyu de Villaviciosa decidieron entamar un alcuentru nuevu que, col títulu de Lliteratura Asturiana Presente, quier poner al día la situación de les lletres asturianes, al empar que reivindicar la so presencia na sociedá.

Van ser diez les meses de debate que se van celebrar dende la mañana del sábadu hasta’l mediudía del domingu nos dos escenarios escoyíos pa la ocasión: el Teatru Riera y la Casa de los Hevia. 54 autores van participar nestes meses pa tratar asuntos como’l presente de la lliteratura asturiana, el relevu xeneracional polos escritores más mozos, la traducción d’otres llingües al asturianu, el papel de los medios de comunicación, la importancia de la lliteratura infantil y xuvenil, la salú de la crítica, la difusión y normalización de la producción cultural, la situación actual de la novela y la visión que de la nuestra lliteratura se tien fuera d’Asturies.

Amás d’un actu d’homenaxe a Xosé Caveda y Nava, que se va llevar a cabu a les puertes de la so casa natal, va presentase’l documental Escribiendo’l camín, 30 años de xuntes d’escritores asturianos y una revista conmemorativa que va axuntar una muestra de los autores más mozos. Como material de reflexón, va dase a los participantes un llibru coles aportaciones crítiques de dellos especialistes que dan la so opinión de los aspectos más relevantes de la lliteratura escrita n’asturianu. Asina mesmo va agasayase a los asistentes con un númberu nuevu de Trabatel. Revista eonaviega de lliteratura.

Más d’un centenar d’escritores confirmaron la so asistencia a la VII Xunta, a la que tamién van dir persones que formen parte de la cadena del llibru y qu’intervienen na promoción de la lliteratura asturiana, como periodistes, críticos, técnicos de los servicios de normalización municipal, representantes d’instituciones, editores, llibreros, etc.

La lliteratura asturiana vista dende fuera

Va cuntase, asina mesmo, cola presencia de trés autores que representen la creación n’otres llingües peninsulares: la poeta cordobesa Elena Medel, l’escritor portugués Jose Rui Teixeira y la escritora valenciana Anna Moner, que van participar al llau de Xuan Bello y Berta Piñán na mesa de debate En perspectiva. La lliteratura asturiana vista dende fuera, que va moderala Martín López-Vega, director actual de Cultura del Institutu Cervantes.

Elena Medel (Córdoba, 1985) ye autora de trés llibros de poesía axuntaos n’Un día negro en una casa de mentira (Visor, 2015), y del ensayu El mundo mago. Cómo vivir con Antonio Machado (Ariel, 2015). Dirixe la editorial de poesía La Bella Varsovia, collabora con dellos medios de comunicación, imparte talleres d’escritura y coordina’l proyectu Cien de cien, para la visibilización de la obra de les poetes españoles del sieglu XX. Ente otros gallardones, ganó’l XXVI Premiu Loewe a la Creación Moza y el Premiu Fundación Princesa de Girona 2016 na categoría d’Artes y Lletres.

Jose Rui Teixeira (Porto, 1974) ye director y presidente del Conseyu Científicu de la Cátedra Poesia y Transcendência. Sophia de Mello Breyner na Universidá Católica Portuguesa de Porto. Forma parte de centros d’investigación en delles universidaes, como la Universidá de París-Sorbona, Universidá Ramón Llull de Barcelona y la Universidá de Boloña. Axuntó la so poesía en Diáspora (2009) y va poco publicó la obra Antípoda (2017). Ye editor de Cosmorama Edições.

Anna Moner (Vila-real, 1967) ye artista y escritora. Ye coautora de la obra teatral La morta enamorada (La muerta namorada), estrenada nel 2010 nel Gran Teatre d’Alzira y nel 2011 nel Teatru Alcázar de Madrid na versión en castellanu. Publicó una docena de rellatos y les noveles Les mans de la deixebla (Bromera, 2011), Premio Enric Valor de la Diputación d’Alicante, y El retorn de l’Hongarès (Bromera, 2015), Premiu Alfons el Magnànim de la Diputación de València y Premiu Túria a la meyor contribución lliteraria. Per otra parte, Gabinet de curiositats (Pruna Llibres, 2015) llogró’l Premiu de la Crítica dels Escriptors Valencians al meyor ensayu (AELC, 2016).

Tags:

Artículos rellacionaos