Sableres d’Asturies con bandera azul

Güei recomendámoste cuatro sableres d’Asturies con bandera azul, porque entá hai díes bonos pa pegase un bañu y por supuestu, facer surf y otres actividaes.

Sablera de Rodiles: La Sablera de Rodiles ye una de les sableres más guapes, visitaes y populares d’Asturies. L’arenal estiéndese a lo llargo d’un quilómetru al oriente de la desenbocadura de la Ría de Villaviciosa. Rodiles cunta con una amplia zona de solombra arbolada con meses y bancos, amás de siendes accesibles. Constitúi amás un llugar privilexáu pa la práctica del surf pola so famosa fola esquierda, una de les meyores d’Europa.

Sablera del Gavieiru:  Magar que se ye conoza nel ámbitu turísticu como Sablera del Silenciu, el nome tradicional ye El Gavieiru. Nun ye namás un arenal que vas querer volver ver, ye unu que va dexate ensin pallabres. Trátase d’una estrecha sablera de regodones d’unos 500 metros de llargor que s’escuende a los pies d’un cantil pimpanu. Les vistes dende enriba son impresionantes, pero si baxes embaxo vas esperimentar lo que significa desconectar del mundu. Porque na sablera del Gavieiru nun hai servicios, nin edificios (el pueblu más cercanu, Castañeiras, asítiase a 16 quilómetros), nin muncha xente. Descúbrela y cúntanos qué te paeció

Sablera de Peñaronda: Una ayalga natural que pue pasar desapercibida. A pie de sablera afayamos la so sitema dunar y llagunar na desaguada del ríu Dola, con vexetación embrionario y dunes blanques nes que s’atopen delles especies incluyíes nel Catálogu d’Especies Amenaciaes de la Flora Asturiana. Ye la única llocalización d’Asturies na que se tien conocencia de la presencia de Malcomia littorea (en peligru d’estinción). Amás tán presentes otres especies como Medicago marina, Otantkus maritimus y Pancratium maritimum, qu’apasionen a los botánicos.

Sablera d’Outur: Tien una estensión de 600 metros y ta constituyida básicamente por sable, anque tamién presenta bloques y afloramientos predrosos. Llugar aparente pal bañu qu’amás axunta bones condiciones pa la práctica del bucéu y del surf. Asítiase nel estremu occidental del conceyu de Valdés, a 800 metros de la llocalidá d’Outur, y a unos 6 quilómetros de L.luarca

Tags: