Salamandrán y Los Rucherinos de la Ría abren les Fiestes d’el Bollu nel Colexu Públicu Sabugo d’Avilés

Anguaño, amás del llexendariu marineru irlandés, Samalandrán, la cultura de la Rucha na Ría d’Avilés asume’l protagonismu nel empiezu de les fiestes de Pascua, el martes 27 de marzu col “XARÉU PRIMAVERA 2018”, entamáu pola Asociación Xaréu d’Ochobre y el Colexu Públicu Sabugo.

Si’l cursu pasáu, por estes mesmes feches, el Colexu Públicu Sabugo de la mano de l’Asociación Cultural Xaréu d’Ochobre recuperaron la “Lleenda culta de Samalandrán”, anguaño propunxéronse recuperar “La Cultura de la Rucha na Ría d’Avilés”.

Esti trabayu, va tener como broche final una folixa primavera que se bautizó col nome de “Xaréu Primavera 2018”.

Cuntóse col asesoramientu del hestoriador Nicolás Alonso Rodríguez  y de Pedro Rodil Apolazáu, fíu de José Rodil Díaz, consideráu por munchos “L’últimu Rucheru de la Ría d’Avilés” (morrió’l 5 d’avientu de 2010).

A nivel educativu, amás d’una forma curiosa de conocer el nuesu pasáu y les nueses tradiciones, el proyectu convirtióse n’una forma de trabayar el respetu a la natura, el recicláu y la reutilización de les coses.

Nun escaezamos qu’amás de les máxiques hestories y lleendes qu’acompañen a esti vezu, el costume de dir a la rucha, ye una práctica sostenible que recicla y reutiliza los oxetos y réfugos qu’abandona l’agua na vera, dándo-yos de nuevu valir.

XARÉU PRIMAVERA 2018 –Colexu Públicu Sabugo –Avilés-

El colexu públicu de Sabugo celebra esti MARTES 27 DE MARZU, la llegada de la Primavera con una folixa onde nun va faltar el tradicional “Manteáu d’Avilés”, la Danza prima”, “Samalandrán” y los “Rucherinos de la Ría”.

Entamen l’actividá l’Asociación Cultural Xaréu d’Ochobre y el Colexu Públicu Sabugo.

TEMPORALIZACIÓN ENVALORADA (Martes  27 de marzu de 2018)

11:30 hores. Llegada de los Rucherinos de la Ría y Samalandrán al SUM.

  • Saludu a los neños y neñes
  • Presentación en Power Point de Samalandrán y Los Rucherinos .
  • Entrugues a Los  Rucherinos y Samalandrán.

12:00 hores. Repartida del “Mantecáu d’Avilés” y los “Güevos de Chicolate”

12:30 hores. Salida al patiu a baillar y cantar

  • Animación per parte de Xaréu d’Ochobre.
  • Interpretación de “Xiraldilla d’Avilés” pol alumnáu, profesoráu y convidaos (Xaréu d’Ochobre).

Van baillar: Los Rucherinos, Samalandrán, los neños y neñes d’infantil y Primaria, el profesoráu y los miembros de l’Asociación Cultural Xaréu d’Ochobre.

Sabugo recupera la Cultura de la Rucha na Ría d’Avilés

Entiendese por rucha el conxuntu de coses que s’atopen na oriella al baxar la marea”, alredor d’ella ñacen hestories y lleendes de pirates y pañadores de la orilla.

Lleenda de la Rucha. Saquiadores o pirates de mariña.

En too la marina del Cabu Peñes, na franxa costera que va dende la Ría d’Avilés hasta la Ría d’Aboño, esiste la creeencia popular de rellacionar la rucha cola piratería de marina. La rucha fadría referencia al saquéu de barcos allancaos na marina. Pensábase que los llugariegos encenderíen lluces, fueos y fogueres nes talayes de los cantiles, pa que los navegantes desnortiaos dirixieren les sos embarcaciones escontra dalgún accidente orográficu que-yos llevase a enxorrar. Dempués, como bonos pirates de marina, arrampuñaríen-yos tolo qu’envaloraren oportunu.

Una práctica de sosistencia. Pañadores de la oriella.

Lo que sí ye una realidá, ye la tradición de dir a “la rucha” como la práctica de dir a la gueta de les coses que la mar arrastra escontra la oriella en baxamar: madera, boyes, apareyos, estaches, etc.

La madera de la rucha, sirvía pa cocinar y calecer los sos llares cuando’l tiempu esfrecía o pa construyir ya iguar casetes, embarcaciones y otros preseos. Ente la rucha, si la suerte acompañaba, apaecía daqué oxetu de ciertu valir, un agasayu que l’agua dexaba na oriella.

Esta forma romántica de falar, na qu’atribuyimos a la mar o al ríu, la capacidá d’agasayamos con pequeñes ayalgues, vuélvenmos abrir les puertes de la fantasía. Un brinde, a dexar correr la nuesa imaxinación.

Contaxaos por esta maxa, quixemos bautizar cariñosamente a José Rodil Díaz, como “L’últimu Rucheru de la Ría d’Avilés”, por ser el prostreru vecín de la Ría que davezu siguía diendo a la rucha. Agora yá nun ta ente nós, pero la so estampa, percorriendo les sableres de Samalandrán y Zeluán cola so carriella y la so traenta, ye yá parte de la memoria coleutiva del nuesu estuariu. Una imaxe gráfica de la hestoria de la nuesa Ría, un iconu  etnográficu que representa la maxa qu’escuende la tradición de dir a la rucha.

Hasta tal puntu, que José Rodil Díaz, cola so querida carriella y la so muyer, Dolores Pulido Gutiérrez, cola so vieya cesta fecha de banielles, inspiraron dos personaxes lliterarios pa la reciella. Dos rucheros máxicos que xunto al monxu Samalandrán, apurren güevos de chicolate y el tradicional Mantecáu d’Avilés,  pa que nengún neñu o neña quede n’estes feches ensin les sos llambionaes preferies. Mitos novalinos de carne y güesu, arraigados a la nuesa tradición, pa festexar l’entamu de la allegre y rellumante primavera.

Artículos rellacionaos

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

La llingua asturiana ye oficial n’Europa

La llingua asturiana va protagonizar una selmana temática demientres los actos oficiales de la ...

Pista de patinaxe sobre xelu en La Esposición (Avilés)

La programación navidiega pa esti añu n’Avilés, inclúi una pista de patinaxe sobro xelu ...