Xixón anuévase como destín gastronómicu

Xixón Turismu presenta l’actualización de los sos productos gastronómicos Gijón Gourmet y Ruta de la Sidra Xixón.

Gijón Gourmet ufierta un menú de preba nos 7 restoranes de la ciudá distinguíos con sellu de calidá, incluyíos los tres con estrella Michelin.

Ruta de la Sidra Xixón propón la visita a seis llagares, tresporte y menú especial en 15 sidreríes distinguíes col Compromisu de Calidá Turística y/o cola marca Sidrerías de Asturias.

Ensin dulda, una de les grandes disculpes pa dexase cayer pela Villa de Xovellanos ye la so gastronomía. Pola so situación, sobre’l mar Cantábricu y a un tiru de los Picos d’Europa, en Xixón ye posible esfrutar de lo meyor de la mar y de la montaña, con pescaos, mariscos, quesos, carne, fabes y tolos meyores productos de la bona mesa asturiana.

El conceyal de Turismu, Deportes, Festexos y Xuventú, Jesús Martínez Salvador, presentó güei nel Restaurante Sidrería La Cuadra de Antón l’actualización de dos de los productos turísticos gastronómicos que permiten esfrutar del meyor sabor de la ciudá asturiana: Gijón Gourmet y Ruta de la Sidra Xixón.

El menú Gijón Gourmet permite descubrir los meyores restoranes de la ciudá. Los siete restoranes que participen cuenten con dalgún sellu de calidá: Estrella Michelin, Sol Repsol, Q Calidad Turística o Mesas de Asturias. Los restoranes son Auga, Bellavista, Casa Gerardo, Ciudadela, La Salgar y Zascandil. El menú inclúi dos entrantes orixinales, dos platos esbillaos, un postre diferente y vinu especialmente seleicionáu y tien un preciu zarráu de 45 euros por comensal. Los tres restoranes gallardonaos con estrella Michelin de Xixón ufierten esti menú de preba por 50 €. Pa la reserva ye preciso dicir que ye un Menú Gijón Gourmet y el númberu de comensales (promoción non válida pa meses superiores a 8 comensales).

Xixón presume tamién de ser la principal mancha sidrera’l mundu. Como novedá, la Ruta de la Sidra Xixón ufre menús sidreros especiales en 15 sidreríes de la ciudá distinguíes col Compromisu de Calidá Turística y/o cola marca Sidrerías de Asturias y que sirven la sidra en condiciones óptimes y escancien tanto en mesa como en barra. Tamién inclúi la posibilidá de visitar seis llagares del conceyu pa conocer tol procesu d’ellaboración de la sidra y preba y, nesta edición nueva, tarifes especiales de les dos cooperatives de taxis de Xixón col sellu de Compromisu de Calidá Turística pa facilitar el tresporte hasta los llagares.

Les sidreríes que participen na Ruta de la Sidra Xixón son: Marisquería Poniente, Sidrería Cabañaquinta, Sidrería La Cuadra de Antón, Parrilla Muñó Poniente, Casa Trabanco, Parrilla Ramón, Sidrería La Tonada de la Guía, Sidrería La Fueya de Tomás, Sidrería El Saúco, Parrilla Muñó Feijoo, Sidrería El Restallu, Sidrería El Requexu, Sidrería La Montera Picona de Ramón, Sidrería Tierra Astur Poniente, Sidrería Marisquería El Llavianu. Los llagares que ye posible visitar son Llagar Trabanco, Llagar Sidra Acebal, Llagar Sidra Menéndez, Llagar Bernueces, Sidra Piñera y Llagar Castañón.

A estos productos gastronómicos súmase Gijón/Xixón Goloso. L’anovación d’esti programa presentóse en mayu d’esti mesmu añu. Nél participen 18 confiteríes y xeladeríes y plantega una ruta pelos establecimientos más emblemáticos de la ciudá al traviés d’unos bonos que puen mercase na oficina de turismu o na web de Xixón Turismu www.xixon.info.

  • Conseyu de redacción de Conocer Asturies. redaccion@conocerasturies.es

Artículos rellacionaos