Cuatro empreses turístiques de la ciudá recueyen el Premiu “Xixón con calidá” pol so bon facer en calidá, sostenibilidá y accesibilidá.

Güei, l’Asociación de Xixón pa la Calidá Turística entegó por sestu añu consecutivu los premios Xixón con Calidá, que se crearon en 2011 y cuntan col sofitu del Conceyu de Xixón. Estos premios busquen reconocer el llabor destacáu de les empreses que participen dafechu nos proyeutos desendolcaos pola entidá y empobinaos a meyorar la competitividá del seutor turísticu llocal per aciu d’afitar acciones de calidá, accesibilidá y sostenibilidá.

Nesta VI edición de Premios Xixón con Calidá apurriéronse cuatro premios:

  • Empresa Xixón Turismu Responsable 2017: MG.LAB. Pionera n’Asturies na producción d’eventos sostenibles. Entama eventos de so y xestiona eventos pa otres empreses ya instituciones incorporando siempres criterios de sostenibilidá.
  • Empresa Xixón Turismu Accesible 2017: RESTAURANTE PARRILLA MUÑÓ – PONIENTE. Tien instalaciones preparaes p’acoyer a persones con movilidá reducida y necesidaes especiales. Tien el cuñu d’Accesibilidá Universal de PREDIF y forma parte del Programa d’Accesibilidá Turística de Xixón.
  • Empresa Xixón con Calidá 2017: COALLA GOURMET. Empresa anovadora qu’apuesta por un modelu de negociu especializáu y que s’estrema pola creación de marques de so.
  • Xestor Xixón con Calidá 2017: LUIS MEANA SUÁREZ, XERENTE RESTAURANTE MERENDERU EL CRUCE. Destaca pol so enfotu constante nel ameyoramientu de la xestión del so negociu, de les instalaciones y l’atención al veceru. La implicación y la capacidá de comunicación y coordinación del equipu de trabayu son dos de los sos valores más sorrayables.

Esti eventu aconceyó a casi un centenar d’empreses turístiques de la ciudá. Afayáronse Jesús Martínez Salvador, conceyal de Turismu del Ayuntamientu de Xixón y presidente de Divertia; Julio González Zapico, direutor xeneral de Comerciu y Turismu del Principáu d’Asturies; Jorge González-Palacios, xerente de Divertia; Ricardo Álvarez, presidente de Xixón Calidá Turística y representante de OTEA, Hostelería y Turismu n’Asturies; David Argüelles, tesoreru de Xixón Calidá Turística y presidente de la Unión de Comerciantes del Principáu; Beatriz Cimadevilla, secretaria de Xixón Calidá Turística y representante d’agospios d’OTEA.

Sobre Xixón Calidá Turística 

Xixón Calidá Turística ye una asociación ensin ánimu de lucru que trabaya col seutor turísticu xixonés pa meyorar la competitividá empresarial y la del destín. La entidá ta representada pol seutor públicu al traviés de Divertia Xixón y pol seutor priváu al traviés d’OTEA, Hostelería y Turismu n’Asturies y la Unión de Comerciantes d’Asturies. Constitúise nel añu 2004 y promueve proyeutos coordinaos coles empreses asociaes a la entidá: hoteles, restoranes, cafeteríes, comercios, museos, taxis, etc… toes elles  actividaes venceyaes col turismu.

L’asociación xestiona’l Sistema Integral de Calidá Turística en Destín (SICTED) en Xixón, que promueve’l Ministeriu de Turismu. Xixón ye líder del proyeutu, col númberu mayor d’empreses distinguides y los reconocimientos de Meyor Destín de Calidá Turística y Meyor Xestora del Proyeutu SICTED en 2012, y el de Meyor Proyeutu d’Ameyoramientu en 2014.

Arriendes d’ello, ye responsable dende 2014 del Programa d’Accesibilidá Turística de Xixón, en collaboración con PREDIF (Plataforma Representativa Estatal de Persones con Discapacidá Física), y del proyeutu Xixón Turismu Responsable, executáu en collaboración col Club d’Empreses de Turismu de Negocios del Principáu d’Asturies.

Tags:

Artículos rellacionaos

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

Temporada de teatru accesible pa persones con discapacidá sensorial y mayores nel Teatru Xovellanos.

El Teatru Xovellanos va ufiertar cuatro produiciones adautaes pa persones con discapacidá sensorial y ...

Berta Piñán gana’l Premiu María Josefa Canellada de Lliteratura Infantil y Xuvenil

La escritora Berta Piñán resultó ganadora de la décima edición del Premiu María Josefa ...

Berta Piñán gana’l 38 Premiu Xosefa Xovellanos de novela n’asturianu

Berta Piñán ha ganado el Premio Xosefa Xovellanos de novela en asturiano, que concede ...