Xixón entama unes xornaes de la cocina tradicional

Diecisiete establecimientos ufren del 23 de payares al 2 d’avientu menús coles recetes clásiques asturianes.

Asturies sabe bien. Y Xixón tamién. Tanto n’Asturies como nel conceyu de Xixón relluma l’actividá culinaria basada na esencia de la gastronomía asturiana, recetes tradicionales y productos de calidá de la nuesa güerta, de los nuesos campos, de la nuesa percuriada cabaña ganadera y de les nueses rules.

Ye por ello que nun ye raro qu’Asturies seya consideráu un paraísu gastronómicu. La hostelería de Xixón, amás, curia y mima les sos recetes y busca fórmules pa promocionala como les Xornaes de la Cocina Tradicional que retoma y actualiza propuestes asemeyaes que va dalgún tiempu se desendolcaben en Xixón y algamaben axuntar al rodiu de les meyores meses a munchos xixoneses y visitantes.

Otea, con la collaboración de Divertia, entama les Xornaes de la Cocina Tradicional y pon de nueves na actualidá gastronómica xixonesa aquellos platos que conformen l’alma del nuesu saber culinariu. Dende’l 23 de payares al 2 d’avientu un total de 17 establecimientos de Xixón inclúin na so ufierta menús ellaboraos colos platos más tradicionales de Xixón. Los menús compuestos de dos platos, postre y bébora tienen una composición y preciu fixu, que depende de cada establecimientu participante. Los menús especiales ufiértense al meudía y/o pela nueche, tamién dependiendo de cada participante.

Pa conocer la composición de los menús, los precios, los horarios de serviciu y l’allugamientu de cada participante, Otea asoleyó un espaciu na web www.escapadaasturias.com onde s’inclúin fiches de cada establecimientu participante con tola información y la so xeollocalización pa conocer ónde ta y tamién, al traviés de Google Maps, recibir les indicaciones sobre “cómo llegar”.

Esta iniciativa lleva apareyáu un programa de promoción y espardimientu p’asoleyala: edición de cartelería, dípticos informativos pa poner nes meses, cartafueyos informativos pa esparder dende los establecimientos y puntos d’interés turístico de Xixón y Gastromapes impresos con información de los participantes, menús, precios y la so llocalización.

Arriendes d’ello, Otea entama un concursu na so páxina de Facebook nel que se sortea un Menú de la Reconquista ente los que xuban una semeya del menú de cocina tradicional que tean prebando indicando’l nome del llocal y cola etiqueta #cocinatradicional

Les propuestes son tan heteroxenees como participantes nel proyectu; nos menús apaecen los nuesos potes, la fabada, sopes de pixín, cocíu de garbanzos, o pataques con calamares de potera, nos primeros; fritos de bacaláu, calamares de potera fritos, caldereta de pescáu y mariscu, la merluza, la chopa, el pixín o el pulpu, en pescaos; callos a l’asturiana, el pitu caleya o’l cabritu, en carnes. Y de postres, naturalmente l’arroz con lleche, los frixuelos, casadielles o la compota de mazana, por poner dellos exemplos.

La ufierta ye atractiva y una oportunidá pa sorrayar los nuesos sabores de siempres, la nuesa cocina más íntima y de la que tolos asturianos y xixoneses nos sentimos mui arguyosos. Y con razón. Poro, ye la que trespasó les nueses llendes y nos afita na cume de les ufiertes gastronómiques d’España.

Participantes:

  • 11 Guajes
  • A Caldeira
  • A Feira El Carmen
  • A Feira La Arena
  • Restaurante As de Picas
  • Sidrería Cabañaquinta
  • Café Central
  • Sidrería Rest. La Casona Jovellanos
  • Sidrería El Fartón
  • Restaurante Johy Los Manzanos
  • Sidrería La Montera Picona
  • Sidrería Parrilla Ramón
  • Sidrería Rest El Sauco
  • La Terraza de Porceyo
  • La Terraza de Viesques
  • Restaurante Trasiego
  • Restaurante Zascandil.

Tags:

Artículos rellacionaos

Tinéu, un destín d’oru

El MOA (Muséu del Oru d’Asturies) ta asitiáu nel pueblu de Navelgas (Tinéu), d’unos ...

Un añu enllenu d’aniversarios hestóricos p’Asturies

2018 ye un añu especial pa Cuadonga (Cangues d’Onís). Conmemórense los centenarios de trés ...

Nueves visites guiaes a la esposición “Voces. La llingua al traviés de los sieglos”

Más de 4.000 persones visitaron yá la esposición Voces. La llingua n’Asturies al traviés de ...

El Parres más indianu

Lo que nel pasáu foi una realidá que marcó la vida de munchos asturianos ...

Asturies superó los dos millones de turistes nel mes d’ochobre

Asturies rexistró 2.080.385 visitantes y 5.082.909 pernoctaciones de xineru a ochobre. “Estos datos confirmen l’enclín ...

Celébrase la entrega de premios del Concursu de Cuentos pola Oficialidá

El sábadu que vien, 1 d’avientu, el Conceyu Bimenes va facer entrega de los premios ...