Xixón pieslla’l cuatrimestre primeru con más turistes que nunca

115.410 persones agospiáronse nos hoteles de la ciudá asturiana nos cuatro meses primeros del añu, un 1,8% más que en 2017 y un 8,4% más que en 2016, lo que supón un récor nuevu hestóricu.

Según los datos oficiales asoleyaos güei pol INE, la cifra total de viaxeros agospiaos n’establecimientos hoteleros de Xixón nel cuatrimestre primeru del añu asítiase en 115.410 persones. Poro, afítase un récor nuevu na serie hestórica. Esta cifra supón un medru del +1,8% respeuto al mesmu periodu de 2017 y del +8,4% respeuto a 2016.

El datu favoratible rexistráu por Xixón contrasta col descensu observáu nel restu d’Asturies y na mayoría de les ciudaes del norte d’España. Namái Xixón y San Sebastián/Donosti rexistren resultaos positivos.

No que cinca a la procedencia de los viaxeros agospiaos nos hoteles de la ciudá, los madrilanos allúguense na posición primera (19.352 persones) y los castellanos y llioneses, na segunda (16.966 viaxeros), siguíos de los asturianos qu’aporten d’otros conceyos de la rexón (12.762 viaxeros), gallegos (11.786 persones) y vascos (11.116 persones). Ye reseñable’l medru de turistes estranxeros, qu’algamen les 13.025 persones, un aumentu del 13,8%

En cuanto al númberu de pernoutaciones la cifra acumulada asítiase en 207.322 pernoutaciones y afítase un máximu hestóricu nuevu, pese al espoxigue de los pisos turísticos. L’incrementu respeuto al mesmu periodu de 2017 ye del +3,6% y del +1,7% respeuto a 2016, añu nel que la Selmana Santa tamién se celebró en marzu. Poro, Xixón sigue siendo’l motor turísticu d’Asturies.

La tasa d’ocupación que se rexistró nel cuatrimestre primeru del añu algama’l 38,6%, un incrementu del +8,2% respeuto al añu caberu. Los fines de selmana la tasa d’ocupación algama’l 50,0%, una variación positiva del +0,9%.

Datos d’abril

A la hora de valorar la comparativa respeuto a años anteriores tien de tenese en en cuenta que la Selmana Santa anguaño cayó en marzu. Poro, les comparatives tienen de realizase respeuto a 2016, añu últimu nel qu’esti períodu vacacional coincidió en marzu.

La cifra total de viaxeros nel mes d’abril ye de 34.469 persones y medra un +14,0% respeuto al mes d’abril de 2016, añu nel que se rexistraron 30.224 viaxeros. No que cinca al númberu de pernoutaciones, qu’algamen 65.344, l’incrementu ye del +12,1% respeuto a abril de 2016, añu nel que se rexistraron 58.292.

  • Conseyu de redacción de Conocer Asturies. redaccion@conocerasturies.es

Artículos rellacionaos

A Conseyeiría d’Educación y Cultura presenta na Caridá el octavo númaro da revista Trabatel

A publicación nacéu como un escaparate prá creación lliteraria actual en gallego-asturiano Trabatel. Revista ...

Festival de vinos de famosos n’Avilés

La ciudá calienta motores pal branu col Famous Wine Festival, el festival de lliteratura ...

Pista de patinaxe sobre xelu en La Esposición (Avilés)

La programación navidiega pa esti añu n’Avilés, inclúi una pista de patinaxe sobro xelu ...

Pablo Rodríguez Medina gana’l Concuru de Cuentos pola Oficialidá de Bimenes

Pablo Rodríguez Medina (L’Entregu, 1978) foi’l ganador del Concursu de Cuentos pola Oficialidá del ...