Xuan Nel Expósito espubliza’l primer manual pa deprender a tocar la curdión diatónica

La obra compónse d’exercicios, y casi cuarenta partitures de pieces tradicionales asturianes xunto con dos discos de muestra de cómo tienen que sonar les interpretaciones.

El métodu d’aprendizaxe del maestru cordioneru ye de nivel pa principiantes, y usa partitures o un sistema numéricu pa identificar cada nota pa les persones que nun tienen conocimientos de llinguaxe musical.

El Manual de Cordión Diatónica tien como finalidá la de valir de método de deprendimientu d’un instrumentu de la tradición musical d’Asturies que comparten munches tradiciones folclóriques mundiales: la curdión diatónica o curdión de botonera. La curdión tocábase habitualmente en territoriu asturianu y n’otres zones vecines como’l norte de Llión y dalgunes partes de Galicia, onde cumplía la mesma función. Con esti manual lo que pretende Xuan Nel Expósito ye afondar nel usu y nel repertoriu d’esti instrumentu y facilitar a la xente que quiera averase al so estudiu una bona riestra de ferramientes que faigan que’l so conocimientu sea entreteníu y permita avanzar nel uso de la curdión.

La curdión diatónica ye un instrumentu aerófonu, quier dicise, que l’aire ye’l motor que produz el soníu. Una canal d’aire fai vibrar unes llingüetes que la cordión tien nel interior y que faen que suene. Les llingüetes tán nes caxes qu’atopamos nos estremos izquierdu y drechu de la parte que nos sirve d’almacén del aire que fai sonar l’instrumentu, el fuelle. En caún de los estremos d’esti fuelle alcontramos dos caxes. Nestes caxes hai unos somieres que valen de soporte a unes llingüetes metáliques que, al runfar, dan una nota.

La botonera que ta na parte derecha del fuelle val pa executar la melodía. Y cola otra mano tócase la botonera de la parte izquierda del fuelle. Con ello podremos facer un acompañamientu rítmico-harmónicu. La curdión diatónica, la diferencia principal que tien colos otros tipos de cordiones qu’esisten, como les cordiones piano o les cordiones cromátiques de botón, ye qu’estes otres son unisonores; quier dicise, qu’en caún de los botones o tecles nun hai más qu’una nota, y non dos diferentes según zarremos o ábramos el fuelle, como pasa cola curdión diatónica o de botonera.

La curdión n’Asturies: nacimientu y contestu
La cordión ye ún de los instrumentos incorporaos nun hai tantu tiempu a la tradición musical del nuestru país. Sabemos bien cual ye l’orixe de la cordión. Ye un instrumentu qu’inventó y patentó l’austriacu, de familia armenia, Cyrill Demian el seis de mayo del añu 1829. La curdión qu’inventó esti fabricante de pianos y d’órganos poco tien que ver col instrumentu actual, porque esperimentó cambeos y evoluciones abondes hasta llegar al instrumentu que se toca agora.

Puede dicise que la curdión ye ún de los instrumentos modernos de la tradición musical asturiana.
Y puede dicise tamién que xunto al vigulín y la xiblata, foi ún de los responsables de que los bailles a lo agarrao llegaren a la nuestra tradición. Ye mui normal atopar en repertoriu de los curdioneros vieyos, al par de les melodíes tradicionales p’acompañar el baille a lo suelto (sueltos, muñeires, saltones, cariaos y sones d’arriba), munches pal
baille a lo agarrao por parexes, como son los valsiaos, les mazurques, les polques, los pasodobles y otres variedaes d’esti tipo de bailles. Los bailles a lo agarrao llegaron cola introducción d’estos instrumentos modernos, de manera que la cordión foi ún de los motores y tamién ún de los precursores de les maneres nueves de facer los bailles qu’entraben daquella n’Asturies.

Les primeres noticies escrites sobre la presencia de la curdión n’Asturies dexónosles Aurelio de Llano l’añu 1928, nel so llibru Bellezas de Asturias de oriente a occidente. Fala nél de la “feria de maestros” de Xera (Tinéu) y de cómo los llugares que nun teníen cerca una escuela nacional comisionaben en conceyu a dalgún vecín pa que na feria d’esti pueblu contratara maestros que punxeren escuela a los neños ente los meses de noviembre y abril. Diz Llano qu’estos maestros yeren mozos de ventitrés a trenta años, y que lo que sabíen yera lo que deprendieren nes escueles del so pueblu. Diz tamién que veníen en grupos dende Vabia y L.laciana con un zurrón al llombu, y que munchos d’ellos trayíen una cordión.

L’Autor del llibru
Xuan Nel Expósito (Uviéu, 1968) empezó la carrera como músicu l’añu 1986, tocando la gaita de la que trabayaba con grupos d’investigación etnográfica como los Urogallos o Riscar y, más tarde, na Andecha Folclor d’Uviéu, onde se formó como curdioneru y escoyó la curdión diatónica por ser una variedá más antigua. Pa deprender a tocar esti instrumentu foi mui importante la escucha de les gravaciones de curdioneros vieyos, procedentes del trabayu de campu d’estos grupos nos qu’Expósito tuvo y nos que tamién participó. Más tarde siguió formándose nel dominiu de la curdión con maestros de la talla de los bretones Étienne Grandjean o Alain Pennec, l’italianu Riccardo Tesi o l’irlandés Máirtín O’Connor. Más alantre llegaron les escueles de les bandes de gaites de La Villa y de Mieres, que dirixía daquella José Ángel Hevia, onde punxo clases de curdión. Col tiempu foi tamién maestro de curdión n’otres escueles d’Asturies y Llión hasta que s’integró en claustru de la Escuela de Música Tradicional Manolo Quirós del Conceyu d’Uviéu, trabayu que compaxina col de maestru de curdión na Escuela del Grupu d’etnografía y folclore Reija de Llangréu.

Nos escenarios Xuan Nel Expósito foi gaiteru de los veteranos Llan de Cubel y curdioneru de los grupos Nordés, Boides, Los Ciquitrinos, La Viérvene, La Pingarata y, sobremanera, d’un grupu fundamental na carrera d’él: Felpeyu, colos que tocó per tola Península Ibérica, Francia, Italia, Escocia, Inglaterra, Canadá, Australia, Llíbanu… y colos qu’editó seis discos. Tamién grabó un trabayu discográficu nel que la so curdión ye la protagonista: «Aire», reconocíu nel 2013 col premiu AMAS al meyor discu folk. Nesta obra tuvo acompañáu de les voces d’Anabel Santiago, Mapi Quintana y Marta Arbas y del pianista Jacobo de Miguel. Na actualidá ta trabayando na reactualización del soníu de les bandines tradicionales y toca cola bandina La Garrapiella.

Artículos rellacionaos

3 rutes pela costa asturiana pa nun quedar atrapáu na nieve.

Sienda costera del Cabu Peñes La villa de Lluanco ye’l llugar escoyíu pa entamar ...

Bailles d’Asturies: El cariáu

Baille de corru estendíu per gran parte del occidente d’Asturies, en conceyos tan distantes ...

Trés barcos hestóricos van atracar en Xixón

Répliques de los más célebres navíos de la hestoria, van poder visitase xuntos per ...

El Parres más indianu

Lo que nel pasáu foi una realidá que marcó la vida de munchos asturianos ...

Un añu enllenu d’aniversarios hestóricos p’Asturies

2018 ye un añu especial pa Cuadonga (Cangues d’Onís). Conmemórense los centenarios de trés ...